Ḳubbe-i eflāk dāire-yi kümbed-i devvār-ı ḳuṭb / Noḳṭa-yı merkez ḳarār-ı çarḫ nuh pergār-ı ḳuṭb

Devrine devr-i felek dönmektedir pervānevār / Şemʿ tek bu encümen içinde tā kim var-ı ḳuṭb

Çarḫ meydānında kūh-i Ḳāf tek ŝābit ḳadem / Seyr ḳılmaz her yana çün kevkeb-i seyyar-ı ḳuṭb

Ḳāḭm u dāim bu evtād içre bir çadıradur / Bāb-ı ʿarş-ı ʿizzet üzre şöyle mismār-ı ḳuṭb

Ḳopsa ger bād-ı ḳıyāmet titrese ʿarz u cibāl / Bir ḳadem ḳılmaz yerinden cünbüş u reftār-ı ḳuṭb

Naṣr-ı ṭāyir tek uçar devrinde rūh-i ins ü cān / Lenger-i ḳaṣr-ı vasaṭda dutmış istimrar-ı ḳuṭb

Pāyidār-ı ʿaşḳına olmaḳ dilersen pāyidār / Nice kim olmış felek devrinde payidar-ı ḳuṭb

Tanı ol ḳuṭbı ki onuñ ẕātına yoḫdur zevāl / Yoḫsa geçdi bu cihān-ı fānḭden besyār-ı ḳuṭb

Ḥayy-ı bāḳḭdür vücūd-ı ẕü-l-ḥayāt u ẕü-l-memāt / Ki yérde gökde murtażādur ulu’l-ebṣār-ı ḳuṭb

Enbiyā u evliyā on sekiz miñ ʿāleme / Oldı Ḥaḳḳdan ẕāt-ı pāḳ Ḥaydar-ı Kerrār-ı ḳuṭb

Dur teberrā ḳıl ʿadū-yı ehl-i beyt-i Ḥaydara / Rūz-ı maḥşer saña ʿavn éde heşt u çehār-ı ḳuṭb

Çıḫma sen dāire-i insān içinden Himmetḭ / Tā saña gün tek cemāliñ eyleye iẓhār-ı ḳuṭb