ʿAlḭdür ʿilmü’l-esmāya üstād / ʿAlḭdür tapdı Ādem ʿilm-i irşād

ʿAlḭdür evvel u āḫir fenāsız / Bu iki ʿāleme mebde-i mḭʿād

ʿAlḭdür ol Ḳur’ān miʿmār-ı kāmil / Benā-yı kün fekāna ṭārḥ-ı bünyād

ʿAlḭden oldı küfr-i şehr-i vḭrān / ʿAlḭden oldı hem dḭn mülki ābād

Ḳalurdı enbiyā ḫayl-ı muʿaṭṭal / Bu yolda ḳılmasaydı ʿavn-ı imdād

Cemāliñ görene dāim āḫır-āb / Yanar ʿaşḳında āteş seyr éder bād

Vücūdıñ ʿaşḳına cān oldı mevcūd / Ṭufeylḭdür bu cümle ḫalḳ-ı ḭcād

Saña şerḥ eyleyim gel gūş u hūş ol / ʿAlḭden soñra kimdür āl u evlād

Kim ol Zehrādur o ŝıbt-i Aḥmed / Ḥasandur şāh Ḥüseyn u Zeyni’l-ʿibād

Muḥammed Bāḳır u Caʿfer-i Ṣādıḳ / Daḫi Muʿsā u Kāẓım şāh-ı Baġdād

ʿAlḭ yaʿnḭ imām-ı cinn ve’l-ins / Ḫorasan ḳuṭbı sulṭān-ı senā-bād

Taḳḭdür kim onı cevād oḫurlar / Taḳḭdür kim ʿAlḭ oldı oña ād

Ḥasandur ehl-i ḭmānıñ ḥiṣārı / Emḭr-i şur ʿAskerḭden cānā feryād

Tecelli eyledi dḭdār-ı Mehdḭ / Ol imdi cān-ı maḥzūn ḫürrem u şād

ʿAlḭdür hācesi dārü’l-emānıñ / Oña ḳul düşdi her kim oldı āzād

ʿAlḭyyun yā ʿAlḭyyun yā ʿAlḭdür / Dilinde Himmetḭniñ vird-i evrād

Baġışla cürmümü āl-i resūle / Bi-Ḥaḳḳ-ı Ḳamber u Selmān u Miḳdād