Şol yed-i ḳudret ʿAlḭdür ism-i ẕāt andan çıḫar / Ẓāhir u bāṭın ẓuhūr her ṣıfāt andan çıḫar

Noḳṭa-yı bādur vücūd-ı murtażā aṣl-ı kelām / Yeddi Muṣḥaf yeddi āyet külliyāt andan çıḫar

Ḳuvvet-i eṣvād u ḥükm-i nuṭḳ emr-i kāf u nūn / Küntü kenzen lekad yaʿni kāināt andan çıḫar

Aḥmede ḥayy ki oldı gevher-i deryā-yı ẕāt / Maʿnḭ-yi ābā u sırr-ı ümmi-hāt andan çıḫar

Bir ḫaber vér ol ne yeddi ḥarfdür kim ey faḳḭh / Otuz iki mihr u dḭv-i mümkināt andan çıḫar

Müşrik olma gel ʿAlḭniñ sırrına bizden ériş / Mustaḥaḳḳ-ı raḥmete ʿaşr-ı zekāt andan çıḫar

On yeddi on bir bir kese bād-ı çeşm u zād-ı ḳāf / Şāh-ı Mürsel leşker-i ve’l-mürselāt andan çıḫar

Ḥācı bu yigirmi sekiz menzili ḳaṭʿ eyleyeñ / Hem ṭavāf-ı kaʿbe hem ṣavm u ṣalāt andan çıḫar

Ḳudret-i Ḥaḳḳ nūn-ı nuṭḳ u kāf-ı kilkindir seniñ / Ḥikmet-i vācib-i vücūd-ı mümkināt andan çıḫar

Ḫıżr-ı vaḳt ol nūş ḳıl nuṭḳ-ı ʿAlḭden bir ḳadeḥ / Āb-ı kevŝer menbaʿ-ı baḥr-ı ḥayāt andan çıḫar

Bu’l-beşerdür Bū-turāb u Bū-turābıñ atası / Külli eşyāʾ müʾminḭn u müʾmināt andan çıḫar

Münşiʾ-i müstevfḭ menşūr-ı ḳısmetdür ʿAlḭ / Ehl-i cennet cemʿine ḳadr-i berāt andan çıḫar

Ḫāricḭniñ ḳoynıdur but-ḫāne-yi ehl-i fereng / Ḫāç u zünnār u çelḭpā biliñ Lāt andan çıḫar

Gülşen-i maʿnḭde naẓmıñ su kimiñ oldı revān / Himmetḭ ser-çeşme-yi Nḭl u Fırāt andan çıḫar