Terk-i ser ḳıl Ḥaydar-ı düldül-süvārıñ ʿaşḳına / ʿAşḳ meydānında server ẕülfiḳārıñ ʿaşḳına

Bḭ tekellüf er degildir Ḥaḳḳ yolında geçmeyen / İki ʿālemden velḭ-yi kirdigārıñ ʿaşḳına

Seyr-i cennetdir mekānı kim ki oldı cān fedā / Munda ol şāh-ı emḭr-i şehriyārıñ ʿaşḳına

Ger münāfıḳlar meni ṣad pāre ḳılsa dönmezem / Ḥaḳḳ ṭarḭḳinde tamām-ı heşt-i çārıñ ʿaşḳına

Leşker-i ervāha kū-yı mesken dārü’l-ḳarār / Bu fenādan el çek ol dārü’l-ḳarārıñ ʿaşḳına

Murtażādur Muṣṭafāya cān-ı dilden doġrı yār / Cān ṭufeyl ét ey muḥibb ol doġrı yārıñ ʿaşḳına

Oldı miʿrāc-ı ḥaḳḭḳat dār-ı ʿibret ʿāşıḳa / Söylerem her dem ene’l-Ḥaḳḳ uşbu dārıñ ʿaşḳına

Başını ṭob ḳoluñı çevgān édüb meydāna gel / ʿĀşıḳ-ı müştāḳ iseñ ol şeh-süvārıñ ʿaşḳına

Yetmiş iki ḳāt ile baş vérdi ol şāh-ı kerem / Sāʾile şol ḫālıḳ-ı perverdigārıñ ʿaşḳına

Sāḳiyā bir cām-ı enʿām eyle bu dil-teşneye / Sāḳi-yi kevŝer şarāb-ı bḭ-ḫumārıñ ʿaşḳına

Himmetḭ yandırsa müşrikler seni dönderme yüz / Vālḭ-yi cennet ḳasḭm-i nūr u nārıñ ʿaşḳına