Oldı göñül pāybest-i silsile-i Ḥaydara / Şāh-ı velāyet ʿAlā ṣaf-şiken-i ṣaff-dere

Ḳālū belādan beri serverimizdir ʿAlḭ / Cānı seri ṣıdḳ-ilen vérmişük o servere

Şeş cehet u nuh felek oldı musaḫḫar aña / Ḥükm-i revāndır beli āy u gün u aḫtere

Ẕāt-ı ʿAlḭdür ʿayān perdeden esrā şebi / Ayine tek vechine gösterür peyġambere

Bu sözi Ḥaḳḳ bilmeyen müşrik-i kāfir midir / Müʾmin-iseñ dem-be-dem laʿnet oḫı kāfire

Küll-i şeyʿe rehber u reh-nümādur ʿAlḭ / Gümrāh olur érmeyen rāh-rev ol rehbere

Vérdi aña ḥükm-ilen minber u miḥrāb-ı Ḥaḳḳ / Ḥaḳḳ degil çıḫmasun ḫırs u eşşek minbere

Nerd-i felek tası çarḫ dest-i velāyetdedir / Saldı nice ġāfiliñ mühresini şeşdere

Nuṭḳ-ı ʿAlḭden içen girmedi şol ḫıżır tek / Çeşme-yi ḥayvān içün ẓulmet-i İskendere

Söyle onuñ medḥini ẕül-kelām ḳıyāmet güni / Var ise meyl eger şol ḳadeḥ-i kevŝere

Mihr-i ʿAlḭdür maña mülk-i beḳā tāc-ı genc / Raġbeti yoḫ göñlümüñ sḭm u zer u gevhere

Himmetḭyem Ḥaydarıñ ḳanberine ḳanberem / Ṭaʿne urar ḥaşmetim salṭanat-ı Sencere