Ṭālibā gel derdiñe dermānı bizden ḳıl ṭaleb / Şehr-i dilde menzil-i cānān bizden ḳıl ṭaleb

Noḳṭa kim onuñ devrinde pergār-ı vücūd / Sırr-ı ẕāt ol nükte-yi pinhān bizden ḳıl ṭaleb

Baḥr-ı vaḥdet kim onuñ emvācıdur bu kāʾināt / Menbaʿ ol baḥr-ı bḭ-pāyān bizden ḳıl ṭaleb

Ġark-ı deryā-yı cehālet olma ol Kenʿān kimi / Nūḥ vaḳtidür zevraḳ-ı ṭūfān bizden ḳıl ṭaleb

Düşme her bir daş içün ʿummāna ey ġavvāṣ-ı ḥırṣ / Maʿden-i dürdāne u mercān bizden ḳıl ṭaleb

Kḭmyādur cismimiz bu cānımız iksḭr-i ʿaşḳ / Gel beri ey kḭmyāger kān bizden ḳıl ṭaleb

Ey müselmānım déyüb daʿvḭ-yi ḭmān eyleyen / Maʿnḭ-yi İslāmı penc erkān bizden ḳıl ṭaleb

Bir ḫaber dut bu ḫuṭūṭi heykel-i raḥmānḭden / Müfredāt-ı defter-i furḳān bizden ḳıl ṭaleb

Çıḫ bugün beytü’l-ḥazḭnden misl-i Yaʿḳūb-ı ḥazḭn / Mıṣr-ı şāhi Yūsuf-ı Kenʿān bizden ḳıl ṭaleb

Kesr-i elvāḥ yed-i beyżā u esrār u ḫıyām / Muʿcizāt-ı Mūsḭ-yi ʿİmrān bizden ḳıl ṭaleb

Genc-i maʿnḭ devlet-i bāḳḭ u mülk-i bḭ-zevāl / Mıṣr-ı şāh evliyā-yı devrān bizden ḳıl ṭaleb

Nuṭḳ-ı rūḥullāh-ı cāvidāniyüz ey Himmetḭ / Āb-ı Ḫıżr çeşme-i ḥayvānı bizden ḳıl ṭaleb