Ezelḭden ʿAlḭdür şāh-ı velḭniʿmetimiz / Onuñ evlādınadur tā-be-ebed biʿatımız

Bize müflis déme ol şāh-ı ġanḭ dervḭşiyüz / Genc-i ḳārūna bugün ṭaʿne ḳılur ḥaşmetimiz

Géymişüz āl-i ʿabā aşḳına bir şāl-ı kühen / Maʿnḭde nūr-ı velāyetden gelür ḫilʿatımız

Ḳılmışuz ḫāk-i derḭn ṣayḳal-ı mirāt-ı ṣafā / Daḳ dutar aya güne āyine-yi ṭalʿatımız

Āyet-i fetḥ u ẓafer yazılur vechimize / ʿArş-ı aʿlādan ötübdür ʿalem-i nuṣretimiz

Kelbiniñ kelbiyüz iḫlāṣ-la ol şḭr-i Ḥaḳḳıñ / Ḳurb-ı ḥażretde budur mertebemiz ʿizzetimiz

Kem-terḭn merḥalemizdür melekūt u ceberūt / Érdi lāḥūta bugün kevkebe-i rifʿatimiz

Dem-i fıṭrat ki bu külli şeyʾ ḫalḳ eyledi Ḥaḳḳ / Oldı taḫmḭr-i ʿAlḭ mihr-ilen ṭıynetimiz

Āftābuz ki oña érmedi noḳṣān-ı zevāl / Tā ebed bāḳḭ-yi pāyendedür devletimiz

Aṣlımız gerçi beşerdür velḭ-yi Ḥaḳḳ-ı emr-ilen / Oldı mescūd-ı melek secde içün ṣūretimiz

Bir düz eşyāya ḫalḭfe ḳamū esmāya ʿalḭm / Ṣafḭyullah çeker neṣeb u nisbetimiz

Bendeyüz Ḥaydara munca şeref u ʿizzet-ilen / Bende olmaḳdur oña salṭanat-ı şöhretimiz

Aṣlına rāciʿ olur cümle şeyʾu āḫir-i kār / Tanı ser-riştemizi aṣla çeker ricʿatımız

İsm-i ṭuġrā yazılır nāme-yi aʿmālımıza / Mihr-i Ḥaydardur anıñ ḥaşr güni ḥüccetimiz

Kelb-i evlād-ı ʿAlḭ Himmetḭyüz terk-i cihān / Bir cova mülk-i Süleymānı satar ḥaşmetimiz