Yandı cānım nāz ile reftāruña ey Yanole / Ṣufīliḳ ḳalur mı bāde süzer iken Ṣofole / Baḳılır mı raḳṣ iderken Mārġo ṣaġ u ṣola / Oynayub ḫora tepüb yorıldı artıḳ Yorġola / Ey Ḫıristola Ḫirostosu severseñ gel berü / Sen de çıḳ meydāna mānend-i piyāle vü sebū

Kār ber nevbet degil mi sen de ḳalḳış o yana / Reşk idüb serv-i sehi başını ṣalsın bu yana / Derle biraz kim boyansın ʿarıżıñ gül ṣuyına / Baḳma mestānıñ bugün lafına hāy u hūyına / Ey Ḫıristola Ḫirostosu severseñ gel berü / Sen de çıḳ meydāna mānend-i piyāle vü sebū

Raḳṣa çıḳ açub o güllü allı fistānını / Ditresün şevḳıyla ditrerken gören pistānını / Aġzı ṣulansın gören ruḫsār-ı ḫoy efşānını / Göñlüni al eyleme meʾyūs gel mestānını / Ey Ḫıristola Ḫirostosu severseñ gel berü / Sen de çıḳ meydāna mānend-i piyāle vü sebū

Bir ayaġ üzre dönüb dolaş döküb gīsūlarıñ / Bāde de süz kim süzülsün nergis-i cādūlarıñ / Baġrın oysun reşk-i zülfüñ sünbül u şebūlarıñ / Dilleri dönsün ḫayāl-i ḫançer-i ebrūlarıñ / Ey Ḫıristola Ḫirostosu severseñ gel berü / Sen de çıḳ meydāna mānend-i piyāle vü sebū

Nūrī-i ġamm-ḫ˅āra göstermek o sīmin sīneyi / Ḫaste-i bī-tāba ṭutmak gibidir āyīneyi / Nola açsañ gerd-i derd-i sīne-i bī-kīneyi / Kim unutmaz raḳṣ idince sen ġam-ı dīrīneyi / Ey Ḫıristola Ḫirostosu severseñ gel berü / Sen de çıḳ meydāna mānend-i piyāle vü sebū