ʿAşḳ-ilen bu ʿarṣada meydān eridür Himmetḭ / Müşrik u müʾminleriñ baġrın eridür Himmetḭ

Ḫāricḭ u Himmetḭ mervānḭ u müşrik degil / Tābiʿ-i āl-i ʿAlḭ Ḥaḳḳ leşkeridir Himmetḭ

Nūr almış ḫāk-i pāyından baṣḭret ehlidir / Pir u şāh-ı velāyet Ḥaydarıdır Himmetḭ

Dḭv-ṭabʿ ḫod-perest ḫod-bḭn degil şeyṭān ṣıfat / Laʿnet ol aḳvāma Ḥaydar çākeridir Himmetḭ

İttiḥādḭ u ṣellūnḭ felsefḭden devrḭden / Nefṭevḭden hem ḥurūfḭden berḭdir Himmetḭ

Ḥaḳḳ ṭarḭḳinde tevellā u teberrāsı dürüst / Ṣanma kim bir nāḳıṣ u bir serseridir Himmetḭ

Pişvāsı reh-nümāsı rehber-i eŝnā ʿaşer / Ḳavl u fiʿl-i Ḥaḳḳa lāyıḳ caʿferidir Himmetḭ

Meẕheb içre farḳ olubdur yetmiş iki fırḳadan / Müʾmin u ṣāliḥleriñ bir kemteridir Himmetḭ

Zerde-gūş-ı rū-siyeh mülḥid münāfıḳ ḳavmiñ / ʿĀmiye ḫar-mühre ṣatmaz cevheridir Himmetḭ

Sünnḭ u gümrāh melʿun münāfıḳ ḳavminiñ / Kesmege başıñ siyaset ḫanceridir Himmetḭ

Ḥaydar-ı kerrār şāh ẕülfiḳārıñ Ḥaḳḳ bilür / Gerd-i rāh-ı düldül ḫāk-i deridir Himmetḭ

Şol velḭ-yi Ḥaḳḳ vaṣḭ-yi Aḥmed iḫlās ile / Ḳanberiniñ ḳanberiniñ ḳanberidür Himmetḭ