Kemer bir ḫalḳa mūy-ı nā-resā evhāmdur bunda / Miyān āġūş-ı ḫulyāya ḫayāl īhāmdur bunda

Bu leyl-i ḳadr zülfüñ ile şāne oldı bī-imsāk / Faṭīr-i nīme ṣad leb ḥasret-i bayramdur bunda

Ṣabāhü’l-ḫayr pīşān-ı melāḥat hīç göz açdurmaz / Ġam endūd-ı ḫaṭuñ tārīkī-i aḫşamdur bunda

Piristū tīz-bāl-i ġamzeñ olmış terkeş ülfete / O mest-i dil-siyeh Tātār pür-ser-sāmdur bunda

‘Araḳ-rīz oldı sāġarda görüp ‘aks-i ruḫ-ı yāri / Dil-i sīm-āba sāyeñ bāde-i gül-fāmdur bunda

Sikender’sin begüm ‘ibretle cism-i ṣāfı seyr eyle / Ḥabāb-ı eşk-i çeşm-i rindi gör nüh cāmdur bunda

Reg-i nabż-ı ḫayāle ursa nīşter ḳatre dem çıḳmaz / O ḫūn-rīz-i müjeñ bir bī-emān ḥaccāmdur bunda

‘Aceb mir’āt-ı bī-sīm-ābdur āyīne-i ḫulyā / Teb-i bī-tāb-ı ḫayret lerziş-i endāmdur bunda

Ḫaṭ u ebrūsı vaḥy-i levḥ-i ṣāfından mı nāzildür / Dimāġ-ı ḳāfiyem ey kilk-i ter zükāmdur bunda

Şemīm āmāde leb yek-bū siyeh bezm-i muṣavvirde / Ġaraż būy-ı fem-i taṣvīrüñ istişmāmdur bunda

Mehāsā fāżıl olmış pertevüñ mihr-i süḫan-tābuñ / Muḳābildür o mihre ḫaylice eyyāmdur bunda

O kūyı dūr-bīn-i ḫāmeden seyr eyledüm Ḫāliṣ / Bu nüh beyte naẓīreñ gerçi bī-hengāmdur bunda