Sirişk-i dīde ey ebr-i kerem mīzābdan ḳalmaz / Ḫayāl-i çīn-i zülfüñ mevce-i girdābdan ḳalmaz

Eger ḳaṣd ile dil-dār āb-ı ṣāfī ṣunsa sāġarla / O cām ‘aks-i leb-i rengīn ile vişn-ābdan ḳalmaz

Temāşā eylesem āyīne-i ḫulyāda endāmuñ / Dilüm bir ḫayli müddet cevher-i sīm-ābdan ḳalmaz

Olan ḫamyāze-rīz ḥasret-i bedr-i cemālüñle / Şeb-i hecrinde rü’yāda daḫı meh-tābdan ḳalmaz

Perestiş-gāh-ı ḥüsnī hedm içün ḫaṭ gelse sulṭānum / Şikāf-ı çāk-i ceyb-i sīnesi miḥrābdan ḳalmaz

Bulursam irtifā‘ı pertev-i mihr-i ‘iẕāruñla / Ümīd-i vaḳt-i vuṣlat sīne usṭurlābdan ḳalmaz

O ġonca-fem ne demde açılur ṣaḥn-ı çemen-zāra / Ki çeşm-i mest-i nergis dīde-i pür-ḫābdan ḳalmaz

Ne mümkin pey-rev olmaḳ ḥażret-i üstād Nābī’ye / Ḳalem-i meşḳ süḫanda Ḫāliṣā ārābdan ḳalmaz