Bu yolda kim ki ʿaşḳa vāṣıl olmaz / Niyāz-ı Ḥaḳḳdan anın ḥāṣıl olmaz

Benḭ ādem bugün üstād-ı ʿaşḳa / Ki şākird olmayınca kāmil olmaz

Cihānda ʿaşḳdan özge metāʿ / Beṣāret ehli aṣla māyil olmaz

Kimiñ ki varsa bir şemme ʿaḳlı / Bu ʿaşḳıñ ḫidmetinden ġāfil olmaz

Onıñ kim yoḫdur başında devlet / Kemāl-i ʿaşḳa billah ḳābil olmaz

Cemāl-i ʿaşḳ bir āyinedür kim / Oña zeng-i ḍalālet hāyil olmaz

Vücūduñ ḳaṣrını pāk étmeyince / Göñül sulṭān-ı ʿaşḳa menzil olmaz

ʿAlḭdür añla mülk-i ʿaşḳa sulṭān / Beşerde böyle şāh-ı ʿādil olmaz

Ḳaderdür ḫalḳa Ḥaḳḳdan ḥükm-i Ḥaydar / Ḳader fʿil-i ḳażādur bāṭıl olmaz

Menim sḭnemde çün naḳş-ı ḥacerdür / ʿAlḭ mihr ki hergiz zāyil olmaz

ʿAlḭdür şehriyār-ı şehr-i ʿaşḳıñ / Münāfıḳlar bu şehre dāḫil olmaz

ʿAlḭdür Himmetḭ göynüñe rahmet / Velḭkin her vücūda nāzil olmaz