Şeh-süvār-ı dḭn ʿAlḭdür server-i merdāne baş / Ey göñül vér ʿaşḳına ol serveriñ merdāne baş

Uşbu yolda cān u ser vérdi rıżā-yı Ḥaḳḳ-çün / Ol velḭ tā ʿilm-i dḭn-i enbiyāyı ḳıldı fāş

Ḫaṣṣa anıñdur ṣaḫāvet hem şecāʿat pey nuṭḳ / Bu cihetden gāh iḥsān eyledi gāh savāş

Ḳul Ḥaḳḳı ḫalḳa iŝbāt étmek-çün dünyāda / Geçdi tḭġından hezārān but-perest u but-tırāş

Bu kevākib-i çarḫ ne çetr-i musaḫḫardur oña / Bir işāret ḳıldıġı-çün döndi maġribden ḳoyāş

Bilmege ʿālemde bu esrarı ʿaḳl gerek / Çün velāyet ʿilmini idrāk eylemez ʿaḳl-ı maʿāş

Hergiz érmez şol şeh-i düldül-süvārıñ gerdine / Lāşeye minmiş felāket birle her bir sust-lāş

Ḳamçı eyle munda ʿaşḳ ruḥuña nefs-i buraḳ / Ḳalma bu ġaflet beyābānında ey ġāfil ulāş

Ger ŝevāb étmek dilersen ḫanda kim görsen bugün / Ḫāricḭniñ başını kes ġāzḭ ol ḳana bulāş

Düşmen-i āl-i ʿAlḭ birlen bu yolda ḥarbe gir / Ḥarbe u tḭġ u teber çek cānıñ olduḳca bulāş

Himmetḭ āl-i Muḥammed ʿaşḳına dönderme yüz / Her ṭarafdan başıña aġyār ger yaġdursa dāş