Āh ey çeşm-i füsūn bī-ḥāba döndürdüñ beni / Seyl-i eşk-i ḥasretüm mīzāba döndürdüñ beni

Kesret-i eşküm dü çeşmānumda ḳuvvet ḳoymadı / Bī-mürekkeb līḳa-i küttāba döndürdüñ beni

Vaṣl-ı hicrān zār-ı cismüm pür-nizār itdükce sen / Saḳf-ı pür-müşrifde yeñi çāpa döndürdüñ beni

Ārzū-yı şemme-i la‘l ile ṣordum sāġarı / Bezm-i meyde zāhidā vişn-āba döndürdüñ beni

Bāb-ı cevrüñ beklerüz zencīrveş ey serv-i nāz / Reft ü rūba göyüne(?) bevvāba döndürdüñ beni

Çār-mıṣra‘la miyān-beste nevā bu ṭavr ile / Cüfte dü yekdür uṣūl Fārāba döndürdüñ beni

Beñzedüp sīmīn-ber-i yāri ḫaṭāyī ḳāġıda / Jāj-ḫā mektūb-ı bī-elḳāba döndürdüñ beni

Vaḳ‘a-i tārīḫ-i hicrānum benüm mażbūṭ iken / Ḥādisāt-ı ravżatü’l-aḥbāba döndürdüñ beni

Pertevüñ mihr-i süḫan-sūzuñ görüp Ḫāliṣ hemān / İrtifā‘-ı ẓıll-i usṭurlāba döndürdüñ beni