Tapdı ḫūrşḭd-i ʿAlḭden cümle-yi ẕerrāt feyż / Maḳdeminden āb-ı ḫıżra ḫıṭṭa-yı ẓulmāt feyż

Buldı kāʿbinden cemāl kaʿbe-yi zemzem ṣafā / Şeş cihād u çār rükn ḳıble-yi ḥācāt feyż

Ẕülfiḳārı Ḥaydarıñ ger olmasa vérmezdi hiç / Cebreʾḭliñ Aḥmede éndirdügi mirʿāt feyż

Ẕāt-ı Ḥaydar ẕat-ı Ḥaḳḳ memsūs-imiş andan vérir / On sekiz miñ ʿāleme şol aftāb-ı ẕāt feyż

Gün teki ḭmānı dḭn ehline ẓāhir gösterir / Nūn-ı nuṭḳından ʿAlḭniñ muṣḥaf-ı āyāt feyż

Ol kerḭmiñ ḫān-ı fażlından ġanḭdir kāināt / Cūd-ı luṭfundan bulubdur külli mevcūdāt feyż

ʿAyn kim nūr-ı ʿAlḭden olmasa bḭnā aña / Ṭalʿat miṣbāḥ vérmez meşʿal-i mişkāt feyż

Her kimiñ Ḥaydar degil Ḥaḳḳdan imāmı ḳıblesi / Ḳılmaz ol merdūde hergiz ḳılduġı tāʿat feyż

Gel velāyet neşʾesinden ḥāṣıl ét bir vaḳt ḥāl / Tā vére keyfiyyetden rūḥuña ṣalāt feyż

Ey münāfıḳ Lātı ḳoynından çıḫar zünnārı kes / Aḫretde müşrike çünkim yetürmez Lāt feyż

Ḥaḳḳ yolında Himmetḭ ʿaceb riyā tek terk ḳıl / Olmayınca nefʿ göstermez saña iŝbāt feyż