Üstād-ı neṣl-i ādem maṭlūb-ı küll-i ṭālib / Keşşāf-ı çār-defter ʿallām-ı ʿilm-i ġāyib / Medḥiñi ins u cinne maʿbūd ḳıldı vācib / Senden ẓuhūra geldi ʿālemde her ḳarāib / Yā menbaʿ-ı velāyet yā maẓhāru’l-ʿacāib

Maḳsūd-ı āferḭniş dānā-yı sırr u levlāk / Nūr-ı velāyetinden müzeyyen oldı eflāk / Üstād-ı āb-ı āteş miʿmār-ı bād hem ḫāk / Leyl u nehār oḫurdı bu vird-i ehl-i idrāk / Yā menbaʿ-ı velāyet yā maẓhāru’l-ʿacāib

Deryā iken bu ʿālem şol raḥmetiñ vekḭli / Yandurdı baḥr içinde hem per-i Cebreʾḭli / Bildirdi ol dem oña ol ḥażreti celḭli / Luṭf-ile kerem ḳıldı ögretdi bu delḭli / Yā menbaʿ-ı velāyet yā maẓhāru’l-ʿacāib

Çün emr-i kaf u nundan vücūda geldi ʿālem / Andan mürekkeb oldı terkḭb-i cism-i ādem / Rūḥ revān érdi derdem mesḭḥ demdem / Söylerdi mehd içinde bu nuṭḳ-ı ibn-i Meryem / Yā menbaʿ-ı velāyet yā maẓhāru’l-ʿacāib

Sensin ʿalḭm-i dānā her ʿilmine ḫudānıñ / Vāḳıf ezel güninden remzine evliyānıñ / Ser-leşker emḭri sulṭān-ı enbiyānıñ / Dāim budur dilinde tesbḭḥ-i eṭḳıyānıñ / Yā menbaʿ-ı velāyet yā maẓhāru’l-ʿacāib

Ol gün ki bende saldı dḭv-i sefḭdi Ḥaydar / Otuz üç miñ otuz il geçmişdi ey birāder / Mescide egleşmişdi eṣḥāb-ile peyġamber / Geldi ḳapūdan ol dem bu söz dilinde ezber / Yā menbaʿ-ı velāyet yā maẓhāru’l-ʿacāib

Ḫallāḳ-ı kün fekāna Ḥaḳḳsın velḭ-yi muṭlaḳ / Dḭn-i resūl buldı senden revāc-ı revnaḳ / Kim sene ẕülfiḳārı gönderdi ḥażret-i Ḥaḳḳ / Çıḫdı revāna düldül ḥacer oldı iki şaḳ / Yā menbaʿ-ı velāyet yā maẓhāru’l-ʿacāib

Oldın refḭḳ-i Aḥmed yaʿni delḭl-i miʿrāc / Cümle nebḭ-yi Mürsel ʿilmiñ ḳaṭına muḥtāc / Başında her velḭniñ pāyın türābıdur tāc / Girdün aṣlan donına resūlden sen aldın bāc / Yā menbaʿ-ı velāyet yā maẓhāru’l-ʿacāib

Ey Himmetḭ ṣıdḳ-ilen iste ʿAlḭden himmet / Tā rūz-ı maḫşer sene Aḥmed ḳıla şefāʿat / Düşmenlerine her dem eyle hezār laʿnet / Oḫu bu ẕikri kāmil āyāt-ı fetḥ-i nuṣret / Yā menbaʿ-ı velāyet yā maẓhāru’l-ʿacāib