Ey ẓuhūr-ı ḳulhüvallah yā ʿAlḭ / Terk-i ḥubb-ı māsevallah yā ʿAlḭ / Nuśret-i naśrun minallah yā ʿAlḭ / Dest-i ḳudret sen yedullah yā ʿAlḭ / Yā ʿAlḭ lillah lillah yā ʿAlḭ / Yā ʿAlḭ müşkilem bük-şād yallah yā ʿAlḭ

Vāsıṭa oldıñ bi-emr-i kaf u nun / Yeddi gök durdı muʿallaḳ sernigūn / Tapdı yeddi ferş āram-ı sükūn / Ḳıldılar bu ẕikri tesbḭḥ ay gün / Yā ʿAlḭ lillah lillah yā ʿAlḭ

Çünki Ādem ḳoydı baġ-ı cenneti / Çekdi çoḫ renc u ʿanā u firḳati / İḫtiyār étdi cihānda firḳati / Oḫudı bu ismi tapdı vuṣlatı / Yā ʿAlḭ lillah lillah yā ʿAlḭ

Ḳopdı fermān-ı ḳażādan āṣıfāt / Ḥaḳḳ deminden cūşe geldi baḥr-ı ẕāt / Ser-be-ser ġarḳ oldı ḫalḳ-ı kāināt / Ol belādan nūḥa sen vérdiñ nicāt / Yā ʿAlḭ lillah lillah yā ʿAlḭ

Fażl-ı iḥsānından ey şāh-ı şehḭd / Érdi ʿavn-ı rebb-i ẕu’l-ʿarşu’l-mecḭd / Dāvūdıñ destinde mum oldı ḥadḭd / Muttaṣıl bu ḥamda olmışdur ḥamḭd / Yā ʿAlḭ lillah lillah yā ʿAlḭ

Yā şehenşāh-ı emḭr-i evliyā / Mūsḭ-yi ʿİmrāna vérdiñ bir ʿaṣā / Oldı firʿavna ʿaṣā-yı ejdehā / Bu-idi nuṭḳında ẕikri dāimā / Yā ʿAlḭ lillah lillah yā ʿAlḭ

Tā İbrāhime sūzān oldı od / Ḫoş ʿalem çekdi firūzān oldı od / Nergis-i neṣrḭn reyḥān oldı od / Oña luṭfundan gülistān oldı od / Yā ʿAlḭ lillah lillah yā ʿAlḭ

Çün Süleymān buldı ism-i aʿẓāmı / Añladı remz-i füzūn muḥkemi / Ḥükmine rām étdi bu ʿālemi / Bu kelam édi nuḳūş-ı ḫātemi / Yā ʿAlḭ lillah lillah yā ʿAlḭ

Mesken oldı Yūsufa ol dem ki çāh / Anda sırrullaha sen oldıñ penāh / Çaha yetdi çahdan çün mihr u māh / Mıṣr-ı ḥüsne ḳılduñ onı pādişāh / Yā ʿAlḭ lillah lillah yā ʿAlḭ

Ferşden ʿarş üstine uçdı mesḭḥ / Şöyle kim gördi ġamū eşyāyı ṣarḭḥ / İʿtibār ét kim budur ḳavl-i ṣaḥḭḥ / Söyledi ol dem bi āvāz-ı faṣḭḥ / Yā ʿAlḭ lillah lillah yā ʿAlḭ

Yārab ol sāʿat ki ḥaşr olur ʿayān / Fāş olur bu cümle esrār-ı nihān / Çaġrışur ol dem ḫalāyıḳ el-amān / Ḳullara sensin şefḭʿ ol zamān / Yā ʿAlḭ lillah lillah yā ʿAlḭ

Bende-yi bendeñ bendesidür Himmetḭ / Bende-yi bendedeñ eksük etmeñ Himmetḭ / Bi-nihāyetdür ḫaṭā u ẕilleti / ʿAfv ḳıl evlād u ālıñ ḥürmeti / Yā ʿAlḭ lillah lillah yā ʿAlḭ