Bir dem ey ṣubḥ güzār eyle gülistānımıza / İstimā ʿét nedir ṭayr-ı ḫoş-elḥānımızā

Ey ṣabā seyr eyle bu müjdemi Yaʿḳūba yetür / Mıṣr fetḥ oldı bugün Yūsuf-ı Kenʿānımıza

Luṭf édüb baṣdı ḳadem mihr-ile ol māh-ı münḭr / Doldı envār-ı żiyā külbe-yi aḥzānımıza

Çizginür çarḫa girüb şevḳine pervāne miŝāl / Muttaṣıl ḥūr u melek şemʿ-i şebistānımıza

Ḳılsa aḥbābına bir remz bugün raġbet-ilen / Cānı teslḭm ederüz şevk-ile cānānımıza

Ḳahr eger luṭf eger mihr eger cevr u sitem / Her ne yār eylese minnet bilürük cānımıza

Biz ʿĀlḭ ḳullarıyuz terk-i ser terk-i cihān / Ḥaddı yoḫdur gire her serseri meydānımıza

Olmadı tā ebed āzād müsellem Ḥaḳḳdan / Kim ki iḫlāṣ-ile düşmedi sulṭānımıza

Er degil ẓāhir u bāṭında ḥelāl oña ḥarām / Ḳılmayan bḭʿat u peymān şeh-i merdānımıza

Mütemerrid durur ol dḭv u ded tek sesi kes / Çünki baş almadı fermān-ı Süleymānımıza

Nice ḫāḳān nice ḳayṣer nice Cemşḭd-i Cemiñ / Ṭopdur kellesi bu ʿarṣada çevgānımıza

[Ḳahḳaha] u ʿanter u hüşām u ġaẓanfer cebele / Ger cebeldir dözemez zarbet-i samsanımıza

Yed-i beyżā u ʿasā seyrini bizden ṭaleb ét / Himmetḭ tā éresin Mūsḭ-yi ʿİmrānımıza