Yaz oldı yine yār ile seyrān etegin dut / Bülbül kimi şevḳ-ile gülistān etegin dut

Ey gözyaşı aḫ su teki her sū bu çemende / Bir ʿārıż-ı gül serv-i ḫırāman etegin dut

Ey dür dileyen ol buʿAden baḥrine ġavvāṣ / Ger laʿl gerek kūh-ı Bedaḫşān etegin dut

ʿAşḳında eger ṣādıḳ iseñ ey dil-i ʿāşıḳ / Gel ṣıdḳ-ile vér cānıñı cānān etegin dut

Şol noḳṭa-yı pergār saña tā ola maʿlūm / Bir ḳuṭb-ı felek kāmil insān etegin dut

Ol Ḥaḳḳa velḭ yaʿnḭ ʿAlḭ şāh-ı velāyet / Ol şḭr-i ḫüdā server-i merdān etegin dut

Çekme yéri bu fānḭde endḭşe-i eflāk / Ol şāh-ı kerem ṣāḥib-i iḥsān etegin dut

Ḥükm-ile ʿAlḭdür bu iki ʿāleme sulṭān / İḫlāṣ-ile gel server-i sulṭān etegin dut

Ger ʿālim-isen eyleme cāhillere bḭʿat / ʿAllām-ı ḳażā kāşif-i Ḳur’ān etegin dut

Ḫum-ḫāneye gir ʿaşḳ-ile ey ehl-i irādet / Peymāne çeküb ṣıdḳ-ile peymān etegin dut

Ger bezm-i ḳıyāmetde gerek bade-yi kevŝer / Gel Himmetḭ yā sākḭ-yi mestān etegin dut

Tā kim olasan āl-i ʿabā ḫaylına dāḫil / Şol himmet elin Himmetḭ Selmān etegin dut