Eyledi vāv-ı velḭ nūn-ı nübüvvetden ẓuhūr / Şöyle kim vāv-ı velāyetden elif eyler ʿubūr

Bu elif bu nūn bu noḳṭa bu nuṭḳ hem / Maʿnḭde bir nūr-ı Ḥaḳḳdur gör bu nūrı olma kūr

Yerde gökde çün ḳuvvetdür nuṭḳ-ı kelām / Bu ḫaberdür ey muvaḥḥid maʿnḭ-yi Allah-ı nūr

Bir noḳṭādur murtażā kim ol noḳṭadan buldı şekl / Müfredāt-ı çār-defter miŝl-i Furḳān u Zebūr

ʿAyn-ı ẓāhir söyleşürdi Ḥaḳḳ-ilen bḭ-vāsıṭa / Dem-be-dem nuṭḳ-ı ʿAlḭden şol emḭn-i kūh-ı Ṭūr

Ḥaydarun ḥükmindedür bu leşker-i ʿarż u semā / İns cinn dḭv u ded bu vaḥş-ı ṭayr u mār u mūr

Ey peser iḫlāṣ-ilen ʿabd ol velḭler şāhına / Ḥaḳḳ saña inʿām éder tā ḫilʿat-i ʿabdu’ş-şekūr

Tanımaz kimdür ʿAlḭ bu ʿaḳl bu idrak-ilen / Bu fenāda olmayınca ādem-i ehl-i ḳubūr

ʿĀlem-i ḳudretde anıñ nuṭḳ u ḥubbı Cebreʾḭl / ʿĀlem-i ḳuvvetde anın ṣabḥasıdur nefḫ-i ṣūr

Şāh-ı ʿādil nāẓır-ı mḭzān u ʿadl-i ḫayr u şer / Mḭr-i dḭvān-ı ḳıyāmet ḥākim-i haşr u neşūr

Sāḳḭ-yi ḫumḫāne u ḫamr-ı daġal māʾ u leben / Rehber u rāh-ı ṣırāṭ u ḳāsım-ı cennāt-ı ḥūr

Himmetḭ sḭr oldı ʿiṣyān-ile ister maġfiret / Āl-i Ḥaydar ʿaşḳına ʿafv-ét günāhı yā ġafūr

Himmetḭ bu şāha ḳıl ḥużūr-ı secde ḳalb-nen / “Leyse maḳbūlu’s-ṣalātu’l-ḳalb illā bi’l-ḥużūr”