Maña mihr-i ʿAlḭdir cān evinde mūnis-i hem-dem / Maña mihr-i murtażādır hem-rāz-ı hem-dem

Ḥaḳḭḳatde vücūduñ genc-i ḥikmetdir velḭkin Ḥaḳḳ / Bu gencin ḥikmeti her bḭ-baṣardan eylemiş mübhem

Ḥarḭm-i ḫāṣṣ-ı Ḥaḳḳdur bu sarāy-ı ḳalbiñ ey müʾmin / Ḥazer ḳılma dḭv-ḥarḭmi ʿizzete maḥrem

Mükerremsen muʿaẓẓamsan gel imdi nefsiñi tanı / Dédi nefsim bilen bilür bilmeyen bilmez Ḥaydar-ı ekrem

Cemḭʿ-i enbiya u evliyādan ol muḳaddemdir / ʿUlūm-ı ẓāhir u bāṭında olur ʿālim-i aʿlem

Velāyet kişverinde şāh-iken sulṭān-ı dḭn Ḥaydar / Ne şeyṭān var-ıdı ey şeyḫ ol ʿālemde ne ādem

Allahıñ ẕātına ẕāt-ı ʿAlḭ memsūḥ-idi mülḥaḳ / Henüz ol demde maḫlūḳ olmamışdı bu iki ʿālem

ʿAlḭ ḥayy-ı ebeddir sulṭān-ı ervāḥ-ı mücerreddir / Deminden endirür çārum felekde ʿḬsḭ-yi Meryem

ʿAlḭ āvāzın éşitdi ʿAlḭ dḭdārıñı gördi / ʿAzizā onda kim vardı miʿrāca seyyid-i ʿālem

Kitābetdür kelām-ı murtażādan ṣūr-ı İsrāfḭl / ʿAlḭdür añla ey ṭālib-i küll-i ġālibe demdem

ʿAlḭniñ ẕülfiḳārından esās-ı enbiya ḳāim / ʿAlḭniñ ḥarb-ı ḫizbinden ḥiṣār-ı şehr-i dḭn muḥkem

İşāretdir bize nuṭḳ-ı ʿAlḭden Himmetḭ fehm ét / Dem-i ʿḬsā u rūḥullah āb-ı ḫıżr-ı cām-ı cemʿ