Menim şāhım ḭmām-ı evliyādur şāh-ı merdāndur / Emḭrü’l-müʾminḭndür server-i meydān-ı merdāndur

Oña Ḥaḳḳdan ʿaṭādur ẕülfiḳār u düldül ü zehrā / Velāyet leşkeriniñ şeh-süvār-ı şḭr-i yeẕdāndur

Ḥaḳḭḳatte zemḭn u āsımānıñ aṣl-ı bünyādı / Ḳarār-ı kürsḭ-yi aʿžām ʿimād-ı ʿarş-ı raḥmāndur

Velāyet-i şāhenşeh bir nūr-ı żiyā-yı māh-ı münevverdür / Nübüvvet ṣubḥuna mihr-ile bir ḫurşḭd-i raḫşāndur

Müsellemdür aña elṭāf-ı Ḥaḳḳdan “lā fetā” mülki / “Şeh-i baḫt-ı sellun-i innemā” şehrine sulṭāndur

Anıñ evṣāfıdur tefsḭr-i teʾvḭl-i kelāmullah / Nihān u āşiḳār ol kāşif-i esrār-ı furḳāndur

Musaḫḫar emrine insān u cinn ser-be-ser eşyāʾ / Velāyet mülkine ol şāh-ı maʿnḭ Ḥaḳḳ Süleymāndur

ʿAlḭdür hem velḭdür hem vaṣḭdür ḥüccet-i Ḥaḳḳdur / Muḥibbe ḥubb-i āl ey muvaḥḥid dḭn ḭmāndur

İki ʿālem elinde fi’l-meŝel bir beyżedür anıñ / Kemāl-ı künhüne idrāk érişmez ʿaḳl ḥayrāndur

Özidür cübbesinden cilve-ger her şūḫ-ı ʿayyārıñ / Veleyken ayrı görmez ṣūreti ẓāhirde pinhāndur

Ḳulaḫdan işidüb gözde görendür Himmetḭ fehm ét / Göñülde fikr-i dilde ẕikr-i tende cevher-i cāndur