Kaʿbe-yi ḥācet ʿAlḭdür ḳıble-yi ehl-i niyāz / Naʿl-i sümm-i düldül ʿuşşāḳa miḥrāb-ı namāz

Āb-ı zemzemden turābı maḳdemi yegdür maña / Āsıtānı Mescidü’l-Aḳṣā érür kūy-ı ḥicāz

Bir ṭavāf-ı ṣad-hezārān ḥac-ı ekberdür bugün / Ḥāciyān gel kim yaḳḭn oldı reh-i dūr-ı dırāz

Zülfleriñ rāh-güzārında turāb ét cismiñi / Ḥaşr meydānında ger olmaḳ dilersen ser-ferāz

Māl u mülk dünyā u ʿuḳbā Ḥaydar ʿaşḳına / Oynadı dārın ḳumār-ı ʿaşḳa rind-i pāk-bāz

Cān u başı vér ḥaḳḭr olur faḳḭriñ tuḥfesi / Sen daḫı sarf ét elinde her ne olsa çoḫ az

Naḳdine żarrāb anıñ çalmaz velāyet sikkesiñ / Ger riyāżet būtesinden tapmasa ḳalbi güdāz

Kim ʿAlḭ yolında olsa ḥayy-ı fiddāreyn olur / Şuʿlesi artar çü şem’iñ başını kesdükce gāz

Ger cevāzı olmasa géçmez bu yoldan ġāfile / Géçmege bil ṣırāṭı ḥabb-ı Ḥaydardur cevāz

Mertebe bābında ẕātıñ Ḥaḳḳ bilür ol ḫāceniñ / Bendesiniñ bendesidür niçe Maḥmūd-ı Ayāz

Ehl-i beyte kim ḳıyāmetde temessük eylese / Her ḫaṭāsından onuñ hüdā-yı bḭ-niyāz

Himmetḭni şāh-ı merdān ḳullarıylan ḥaşr ḳıl / Āl-i Aḥmed ʿaşḳına sen yā kerḭm-i kār-sāz