Ẕāt-ı Ḥaydardan görindi ʿāleme āŝār-ı Ḥaḳḳ / Şuʿle çekdi gün-teki her ẕerreden envār-ı Ḥaḳḳ

Nuṭḳ anıñ küntü kenzen bābına miftāḥ-ı ġayb / Andan oldı kāināta maʿnḭde iẓhār-ı Ḥaḳḳ

Rehber-i rāh-ı ʿaleʾl-ʿarş-ı istivāʾdır Murtażā / Hādḭ-yi miʿrāc-ı Aḥmed maḥrem-i esrār-ı Ḥaḳḳ

Secde ḳıl ṣıdḳ-ile sen ol şāhıñ cemālına / ʿĀrif-i āyātsan ey ʿāşıḳ-ı dḭdār-ı Ḥaḳḳ

Dāstān-ı Ḥaydar-ı kerrārı söyler şevk-len / Bu çemende ṣed-hezārān bülbül-i gülzār-ı Ḥaḳḳ

Külli maḫlūḳāta oldur ḥavl-i ḳuvvet ṣavt-ı nuṭḳ / Söyledi ṣaddaḳ bu ḳavle ṣādıḳ-ı aḫbār-ı Ḥaḳḳ

Her emānet kim ḳabūl étdiñ ḫıyānet ḳılma kim / Żāmini berdār éder ol şıḥne-yi bāzār-ı Ḥaḳḳ

Aḥmede yār olmasa her ẓālim-i nefs-i cühūl / Dḭn yolunda Ḥaydara yār olmayan aġyār-ı Ḥaḳḳ

Muṣṭafā u murtażānıñ āline evlādına / Kim ki yār oldı iki ʿālemde olur yār-ı Ḥaḳḳ

Kim ʿAlḭ yaʿnḭ velḭyullahı inkār eylese / Müşrik-i dḭv-i münāfıḳdur éder inkār-ı Ḥaḳḳ

Yüz çevirme ger ʿAlḭ ʿaşḳına berdār étseler / Tā ola dār-ı ḥaḳḭḳatde maḳāmıñ dār-ı Ḥaḳḳ

Himmetḭ merdānedür ʿahdın üste muḥkem ol / Çün ḳālū belādan eylediñ iḳrār-ı Ḥaḳḳ