Ne reng virdi ‘iẕār üzre la‘l-i cām saña / Yeter bu tābiş-i mihr-i ruḫuñ müdām saña

Durur fütādelerüñ reh-güẕār-ı ‘ışḳuñda / Müyesser olmadı ey şūḫ bir selām saña

Dilüñ senüñ daḫı ol ṭıfla dil-rubūde imiş / Yeter o şūḫa maḥabbetle bu ḳıvām saña

Eküp ḥadīḳa-i ḫulyāya ṭoḫm-ı nergisini / Bu eşk-i çeşm ile bes reşḥa-i ġamām saña

Müdām merdüm-i çeşm oldı reft ü rūba dūçār / Efendi çoḳ mı bu ḫiẕmetde bir ġulām saña

Şeb-i taḥassürümüz geçdi neyl-i būse içün / Bu cām virmedi ser-mestī-i menām saña

Ṭabī‘at daḫı meyil itdi nükte-i ḫaṭṭa / Yaḳışdı bu ḫaṭ u eş‘ār-ı iltiyām saña

Gelince ḫāṭıra tāb-ı maḥabbeti Ḫāliṣ / Ne reng virdi ‘iẕār üzre la‘l-i cām saña