Söyler dehen-i ġamze baña lā vü ne‘amsüz / Ebrūları taḥrīr-i rumūz itdi ḳalemsüz

Te’līf idiyor ḳudreti var faṣl-ı dürūġı / Āġāz idemez ṣohbet-i cānān ḳasemsüz

‘Uşşāḳ görür zülfini sevdāları ḳalḳar / Gelmez hele bir ḥaste eṭibbāya veremsüz

Sāḳī dilüñ al öp ayaġuñ pīr-i muġānuñ / Mestāneye bir dem mi olur sāġar-ı Cem’süz

Ḫam-geşte miyān merdümek-i çeşm çü ḫalḳa / Çeşmüm göremez zülfini ārāyiş-i ḫamsüz

Bir gül göricek evc ü ḥüseynīye çıḳarsın / Olmaz mısın ey bülbül-i şūrīde naġamsuz

İtmiş yine meh sünbüli zīb-āver-i kākül / Bir gün naẓar-ı mihr olamaz bāġ-ı iremsüz

Pāpūşını ḳaldırmadadur merdümek-i çeşm / Cānān olamaz ḫiẕmeti çoḳ iki ḫademsüz

Ḫāliṣ naẓar-ı çeşm ü dilüñ ka‘b-ı latīfi / Yār ile geçinmek güç olur būs-ı ḳademsüz