Kim ki iḫlāśla ol servere merdāne gider / Ḥaḳḳ bilür Ḥaḳḳ yolına ʿaşḳ-ile merdane gider

Cevşen-i ṣıdḳ géyüb tḭġ-ı tevekkül ḳurşanub / Leşker-i ḫırsla ḥarb étmege meydāna gider

ʿAşḳla dār-ı ḥaḳḭḳatde ene’l-Ḥaḳḳ çaġırur / Cān u ser terkin édüb ṣoḥbet-i cānāna gider

ʿAḳl-ı Cebreʾḭl demḭ yay-ı vahdet rūḥ-ı buraḳ éyleyüben / ʿArş gülzārına Aḥmed kimi seyrāna gider

Nuṭḳ-ı cān-baḫş-ı ʿAlḭden oḫuyan ʿilm-i sabaḳ / Ḫıżr olur maʿnḭde ser-çeşme-yi ḥayvāna gider

Keştḭ-yi fetḥ-i necāt oldı bize mihr-i ʿAlḭ / Ger minen Nūḥ ise bu keştḭye ṭūfāna gider

Gitse yolında eger başı zehḭ faḥr-i şeref / ʿĀdet-i resmdür ḳoç ḳuzı ḳurbāna gider

Cürʿa-yı cām-ı velāyetden içen mest-i elest / Fānḭde yek-sere Ḥaḳḳ bezmine mestāne gider

Fānḭden eylese aḥbāb-ı ʿAlḭ ʿazm-i sefer / ʿAşḳa yoldaş oluban cennet-i rıḍvāna gider

Çıḫsa ger ḫāriciniñ cānı teninden lā-şek / Ol ceḥennem odına tā-be-ebed yāne gider

Her niçe doğru yola dḭvi delālet éderem / Ġul-ı bed-ṭḭnet-i gümrāh biyābāna gider

Kerkesiñ meyli eger cḭfe-yi murdāra çeker / Himmetḭ bülbül-i ḫoş-ḫān gülistāna gider