Yā mehdḭ-yi hādḭ ser-merdān-ı velāyet / Ey pādişeh-i ʿādil sulṭān-ı velāyet

Ey rākib-i düldül ne daḫı munca taʿallül / Ḫatm oldı saña ʿarṣa-yı meydān-ı velāyet

Defʿ étmek içün müşrik-i deccāl-ı laʿḭni / Vaḳt olmadı mı kim çıḫa ṣamṣām-ı velāyet

Çal guy ṣıfat kellesine ḳayṣer-i rūmuñ / Destindedür ol deste-yi çevgān-ı velāyet

Pes munṭaẓıru’l-vaḳt saña ʿālem u ādem / Bismillah āya ṣāḥib-i devrān-ı velāyet

Mülk-i meleki dutdı şehā ẓulmet-i ʿiṣyān / Göster yüziñi ey meh-i tābān-ı velāyet

Doldı bu serā cevr-ile ey server-i ʿādil / Ḳur şimdi cihān ehline mḭzān-ı velāyet

Ḫükmüñ yeridür ẓulm-ile her ẓālim u cāhil / Bir ġavra yet ey ḥākim-i dḭvān-ı velāyet

İŝbāta yetür daʿvḭ-yi ṣādıḳları sensen / Aḥbāblara ḥüccet u burhān-ı velāyet

Ḳıl yeryüzüni ṭalʿat-ı mihr-ile münevver / Çıḫ perdeden ey kevkeb-i raḫşān-ı velāyet

Çoḳ çekmişüz ey şāh keŝret-i ḳıllet / Müʾminlere çek luṭf-ile gel ḫān-ı velāyet

Sensen bugün ey Himmetḭ ol ḫıżr maḳāmı / Nuṭḳuñdan aḫar çeşme-yi ḥayvān-ı velāyet