Ḳalb-i şāh-ı evliyādur āsumān-ı maʿrifet / Nuṭḳ-ı pāki ʿarş-ı Ḥaḳḳa nerdibān-ı maʿrifet

Ferşden bu nuṭḳ ʿarşa dem-be-dem eyler ḫurūc / Nuṭḳdur ol şāhbāz-ı āşiyān-ı maʿrifet

Murtażādur kāşif-i esrār levkeşfü’l-ḳażā / Genc-i esmā menbaʿ-ı maʿnā beyān-ı maʿrifet

Men ʿaref ʿilmiñ ʿAlḭden oḫı ger ʿirfān-iseñ / Oldı zirā ismi ṭuġrā-yı nişān-ı maʿrifet

Oḫı nefsiñ nüsḫasında müfredāt-ı rāyını / Fetḥ ola tā kim saña Ḥaḳḳdan cihān-ı maʿrifet

Sḭne-i pakine Ḥaydardur ey gevher-şinās / Maʿden-i ʿilm u kemāl u ḥilm kān-i maʿrifet

Ḳudret u ḳuvvet ṣıfāt u zāt hikmetdür ʿAlḭ / ʿAşḳ u ʿaḳl u rūha meskendür mekān-ı maʿrifet

Nesl-i Ādem ḫalḳ-ı ʿālem tanıya kimdür ʿAlḭ / Ger bugün seyr éder iẓhār-ı şifā-yı maʿrifet

Gerçe ḥayydur ʿālem-i maʿnḭde amma ḥayy degil / Olmasa her kimiñ cisminde cān-ı maʿrifet

Neylediler ḥāmil-i Ṭevrāt u İncḭl u Zebūr / Ṣāḥib-i furḳāna geldi bu zamān-ı maʿrifet

Virmedi bu manṭıḳa Dāvūd ḭsḭ Mūsā hem / Yaʿnḭ evsaf-ı ʿAlḭdür dāstān-ı maʿrifet

ʿAndelḭb-i ḳuds onuñ meddaḥıdur leyl u nehār / Ḫāk-i dergāh-ı ʿAlḭdür gülistān-ı maʿrifet

Himmetḭ iki cihānıñ niʿmetin şöyle bil / Fāriġ u mustaġnḭdür mihmān-ı ḫān-ı maʿrifet