Kün dédi ḫallāḳ eşyā kün-fekān oldı ʿayān / Cinn u ins bu cihan u ol cihān oldı ʿayān

Bil bu güftārıñ beyānın ʿārif-i esrār iseñ / Küntü kenzen yaʿni bir genc-i nihān oldı ʿayān

Bu cemādāt u nebātāt bu ḥayvānḭ ki var / Mümkināt-ı cümle bu ʿayn u ʿayān oldı ʿayān

Şol velḭ kānıñ mübārek ismi olmışdur ʿAlḭ / Nuṭḳ-ı pākinden bize munca beyān oldı ʿayān

Ṣūret-i Furḳān-ı Aḥmed maʿnḭ-yi esmā-yı küll / ʿĀrif-i ʿilm-i zemḭn u āsımān oldı ʿayān

Géydi ādem ḫilʿatıñ seyrāna geldi ʿāleme / Sırr-ı ẕāt-ı Ḥaḳḳ nişān-ı bḭ-nişān oldı ʿayān

Ḳıldı ol hādi hidāyet leyletü’l-miʿrācda / Muṣṭafāya tā ṭarḭḳ-ı lā-mekān oldı ʿayān

Perde-yi ʿizzet açıldı aradan gétdi ḥicāb / Aḥmede esrār-ı şāh-ı ins u cān oldı ʿayān

Ḳāmet-i ruḫsār-ı zülfünden ḥabḭbiñ ey muḥib / Hem ḳıyāmet ḳopdı hem nūr-ı duḫān oldı ʿayān

Pertevinden kāinātıñ ẓulmetiñ nūr eyleyen / Bir güneş ṭalḭatlu māh-ı āsımān oldı ʿayān

Genc-i pinhānıñ ṭılsımātıñ uşattı ḥükm-ilen / Ġaybdan bir server-i ṣāḥib-ḳırān oldı ʿayān

Ḥıżr-ı vaḳt ol bize hem-rah-iseñ ey Himmetḭ / Mehdi çıḫdı fitne-yi āḫir zamān oldı ʿayān