ʿAḳlım oynatmış idi sīm-beden bir cān-bāz / İpucı arar idim eylemege ʿarż-ı niyāz / Beni mīzān-i nigāha alub itdi iʿzāz / Gözi baġluları gözlermiş o bī-çare nevāz / Ben ṣanurdım ki oyundur baña bu itdigi nāz / Nice ʿaḳreb-meniş erkānsıza oldı dem-sāz

Ḳurduñ ey şūḫ Ḥalīme menziliñe gehvāre / Ṭıfl-ı nev-sāleler aldatmaġa bulduñ çāre / Ben ṣalıncaḳ gibi ṣallanmadayım hem-vāre / Eyleme göñlimi de reşkle pāre pāre / Düz ayaḳ baṣsa ḳolay yan çiziver aġyāre / Baġdaşır olma bucāġıñda aña ḥarf endāz

Beni ol ipsiz ile baġlama sen ey meh-rū / Ben ḳalender revişim neyleyeyim ya şu bu / Gelse naʾleyn ile çünkü uṣulatmaz ṣancu / Çevirir añı gören mihr-i ecelden yaña rū / Żannider vaṣlı ḳolay yan gelür ol bed-ḫū / İpe un ser ki begim itmege lāfa āġāz

Ṭartamaz nīk u bed-i ʿālemi de mīzānsız / Deve ṭabanı atar lāfı nice erkānsız / Öyle yüksekde gezen düşse gerekdir cānsız / Mıḫ başı gibice ayaḳ atan cānānsız / Ṭurna ayaġı gibi ḳalsa gerek dermānsız / Menzil-i ʿaşḳa varan olmalıdır pek ḳurnaz

Ne revā menzil-i ḥüsne güzelim baṣ da ayaḳ / Ḥalḳa-i ḥasretiñi pāy-ı dil-i zārıma ṭaḳ / Pertev-i ʿaşḳını da böyle göñüllerde bıraḳ / Cān almaḳsa merāmıñ ne gerek öyle bıçaḳ / Rişte-i dūd-ı dilimle şerer-i āhıma baḳ / Gūyya bir ipe çıḳmış gibidir āteş-bāz

İplemezse nola ipsizleri ol bī-insāf / İlişüb kākülüne itmiş ʿalāka eşrāf / Olamaz sine-i berrāḳına hiç lāf u güzāf / Didi bu mıṣrāʿ ḥaḳḳında belīġ-i vaṣṣāf / Reşk ider pertev-i naʿleynine āyīne-i ṣāf / Yürüdükce resen üstünde o şūḫ-ı mümtaz

İpucı bulamadım vuṣlat-ı yāre ne ʿaceb / Çırpıdan çıḳmadım ammā buña ne oldı sebeb / Nūrīyā añlaşılan ġamz-ı ʿadūdandır heb / Vardır ortada çünkü o raḳīb-i ʿaḳreb / Elim al rāh-ber ol menzil-i vaṣla yā Rābb / Dil-i sengin-i dilārāya vir inṣāf biraz