Ḥaḳḳ deminden mest-i ḥayrānım ezelden tā ebed / ʿĀşıḳ-ı dḭdār-ı cānānam ezelden tā ebed

Gitse ger başım yolunda olmazam bir dem melūl / Ḫürrem u dil-şād-ı ḫandānam ezelden tā ebed

Nāzil oldı çünkü Ḥaḳḳdan “āyet-i lā taḳnaṭū” / Kāşif-i elṭāf-ı iḥsānam ezelden tā ebed

Ḳanberine bendeyem cān u göñülden Ḥaydarıñ / Çāker-i yek-reng-i Selmānam ezelden tā ebed

Ṣādıḳ-ı aḳvāl ṣādıḳ-ı peyrevem heşt-i çehār / Cān-fedā-yı āl-i ʿimrānım ezelden tā ebed

Ey muḫālif emr-i Ḥaḳḳ birlen emirimdür ʿAlḭ / Ol emḭre bende-yi fermānım ezelden tā ebed

On iki maʿṣūma ṣıdḳ-ile tevellā ḳılmışım / Ey muḳallid ehl-i ḭmānım ezelden tā ebed

Mekr édüb oġratmazam yoldaşımı yoldaşına / Ḫāk-i rāh-ı şāh-ı merdānım ezelden tā ebed

Ṣıdḳ-ile tob étmişim meydān-ı ʿaşḳa göñlümi / Terk-i serser-merd-i meydānım ezelden tā ebed

Ḳāḍı-yı dḭn-i Muḥammed leşker-i ṣāḥib-zamān / Ḳātil-i deccāl-i mervānım ezelden tā ebed

Bu vücūdum şehrine Ḥaḳḳdan bi-ḳavl-i “men ʿaraf” / Himmetḭ ḥükmüyle sulṭānım ezelden tā ebed