Vāḳıf ol ʿilm-ile bu esrārdan ey ḫoş murād / Ḫālıḳa ẕāt-ı ʿAlḭdür āferḭnişden murād

Ḫamsetü’l-esmā yazıldı tā muʿallaḳ dört çarḫ / Yaʿni ʿarşullah bil nūr-ı velāyetdür imād

ʿArşu ferş ʿavn-ı Ḥaḳḳ birle ʿAlḭdür saḫlayan / Gel bu ḳula söyle “āmennā ve ṣaddaḳ” yā ʿibād

Érdi Ḥaḳḳ izni buyurdı şol yedullah-ı ġayūr / Ḳavm-i ʿĀdı ser-be-ser ṭūfāna vérdi tünd-bād

Ger ḥimāyet ḳılmasaydı ol server-i merdān-ı dḭn / Küfr-ile dutmışdı cümle yeryüzin ehl-i fesād

Ḳāim oldı ẕülfiḳārından esās-ı enbiyā / Her nebḭ devrinde min ġaddār-ilen ḳıldı cihād

Ol kelāmullah-ı nāṭıḳ maẓhār-ı ḥarf-i nuḳṭ / Ḥarb vaḳtinde menem dér kef ha elif sin ayın ṣād

Mḭr-i ḫayl u müʾmin u şāh-ı aṣḥābu’l-yemḭn / Defʿ-i aṣḥab-ı şimāl dāfḭʿ-yi ḳavm-i inād

Ḍarb-ı ṣamṣāmından ābād oldı şehr-i mülk-i dḭn / Ḳāim-i meẕheb ü millet ḳuruldı ʿadl u dād

Ḫayberi yıḫdı benā-yı küfri vḭrān eyledi / Müşrik-i dḭv-i ḥasedün oldı bāzārı kesād

Genc-i Ḳārūn oldı ehl-i ʿaşḳa mihr-i ehl-i beyt / Bulmışam ol genc-i Ḥaḳḳdan olmışam ḫandān-ı şād

Himmetḭ eydür turāb-ı reh-güẕār-ı Ḥaydaram / Bir vücūd-ı kemter kanımda taḫt u tāc-ı Keyḳubād