Gördügüm günden berü zülfini zihnim ṭolaşıḳ / Dīde-i baḫtım bu yüzden gāh uyur gāh uyanıḳ / Göñli açılsun raḳībüñ de benim ḳalbimi yıḳ / Baʾde ẕā yüz ṣuyı dökmez saña bu baġrı yanıḳ / Git öpeyim ayaġın meyḫāne-i şevḳim yıḳıḳ / İstemem ey seng-dil mey şīşe-i ḳalbim ḳırıḳ

El ayaḳ çekilmede yavaş yavaş şimdeñgerü / Var raḳīb ile ko bir yaṣtıġa baş şimdeñgerü / Zülfüñ oḫşat ellere ṣarmaş dolaş şimdeñgerü / Baṣayım ben baġrıma ḥasretle taş şimdeñgerü / Git öpeyim ayaġın meyḫāne-i şevḳim yıḳıḳ / İstemem ey seng-dil mey şīşe-i ḳalbim ḳırıḳ

Elde lāleyle piyāleyle baṣub gülzāra pāy / Kākül-i sünbül-nihāduñ ʿārıż -ı āl üzre yay / Gül yüzin bülbül görüb itsün hezārān hūy u hāy / İnlesüñ künc-i taḥassürde göñül mānend-i nāy / Git öpeyim ayaġın meyḫāne-i şevḳim yıḳıḳ / İstemem ey seng-dil mey şīşe-i ḳalbim ḳırıḳ

Mevsim-i ẕevk u ṣafādır geldi çün hengām-ı yaz / Var kenār-ı cūda ʿıyş u nūş it ey serv-i nāz / Eyle var aġyār ile nāz u niyāz u söz u saz / Baña bu itdükleriñ unutma şu dīvāre yaz / Git öpeyim ayaġın meyḫāne-i şevḳim yıḳıḳ / İstemem ey seng-dil mey şīşe-i ḳalbim ḳırıḳ

Ḫavf idüb Allahdan itmez misüñ ḳuldan hicāb / Eyledüñ sāġar başına biñ ʿitāb u bin ʿazab / Vaz geldim kim ile olur iseñ ol var neşe-yāb / Nūrī-i mest-i ġamem göñlüm kebāb eşkim şarāb / Git öpeyim ayaġın meyḫāne-i şevḳim yıḳıḳ / İstemem ey seng-dil mey şīşe-i ḳalbim ḳırıḳ