ʿĀlem-i ḥikmetde Meryem-i mesḭḥādur nefes / Maʿnḭ-yi nuṭḳ-ı mücerred rūḥ-ı ḭsādur nefes

Çıḫmasa bir demde mevcūd-ı ʿadem yeksān olur / Ḳuvvet-i ṣavt u kelām nuṭḳ-ı gūyādur nefes

Ḳāmet u ruḫsārıñ ey Ādem seniñ nār-ı şecer / Fiʾl-meŝel bu nefes kūh-ı ṭūr-ı Mūsādur

Ten maḥall-i rūḥ menbaʿ-ı nuṭḳ çün āb-ı revān / Her göñül deryā-yı aʿẓam mevc-i deryādur nefes

Nuṭḳ-ilen ruh u nefs bir şeyʾ-i vāḥiddir bular / Kimse bu esrāra érmez bir muʿammādur nefes

Ey humā-yı sidre bir dem bu mekāna séyr ḳıl / Ḳulle-yi ḳāf-ı ḳadḭmdür cism-i ʿanḳādur nefes

Bu ceseddür çār ʿanāṣır āsımān-ı erbaʿ / Nūr-ı ẓulmet aftāb-ı ʿālem-ārādur nefes

Ṣūr-ı İsrāfḭl demdem ʿillet-i mevt-i ḥayāt / Vaḥy-i münzel Cebreʾḭl u ʿarş-peymādur nefes

Muḥḭṭ-i Ḳur’ān -ı nāṭıḳdur maḳām-ı keşf-i ḥāl / Tā ebed pāyende u bāḳḭ u iḥyādur nefes

Uyumaz leyl u nehār u ġāfil olmaz bir zamān / Pāsbān-ı taḫt u rūḥ u şehr-i ʿażādur nefes

Her emr eylese üstaddur nefs redd eyleme / El-ḥaẕar andan ki bir şemşḭr-i burrāndur nefes

Ger saña gevher gerek ʿummāna gir ey Himmetḭ / ʿAşḳ baḥr-ı ten ṣadef lüʾlüʾ-i lālādur nefes