Sürünüb ṭaşlara eşkimle beraber ḫançer / Eridüb yaġını mānende-i neşter ḫançer / Olsa ger hem-ser-i sekine-i berber ḫançer / Bulsa zengār-ı hatt-ı yār ile cevher-i ḫançer / Tīġ-i ebrūya sitemkār eyler ḫançer

ʿĀlemi bir kula ṣatmaz mı muḥabbet kārān / Kişver-i vaṣla cān itmez mi muḥabbet kārān / Giceyi gündüze ḳatmaz mı muḥabbet kārān / Yorulub ḳan dere batmaz mı muḥabbet kārān / ʿAdem iḳlimine bir anda yollar ḫançer

Ebrūvāñun çataraḳ çıḳmış idi çün ol māh / Bilmezem cünbiş-i ebrūsına mı itdi nigah / Cān sipār anın͡ g aḥvāline olmuş āgāh / Ḫunfeşān sitem u nāz degildir billāh / Küşte-i ʿaşḳ olanıñ ḥaline aġlar ḫançer

Düşdiler bir yola ammā yoġıdı tāb u tüvān / Giryeden farḳ idemezler idi pes u pīş u yan / Ṭutdı ṣaḥrāları ucdan uca zehr-ābe vü ḳan / Reh-neverdān-ı ġamıñ göstersin aḥvāli yamān / Çeşm-i ahū-yı füsūn pençe-i ejder-i ḫançer

Ṣanma ey dil ki her ehl-i suḫan añlar diliñi / ʿAdem iḳlimini geşt eyleyen añlar diliñi / Meleküʾl-mevt ile ülfet iden añlar diliñi / Eceliyle var ise söyleşen añlar diliñi / Tercümān olmuş aña ġamzene söyler ḫançer

Saʿy-ı çeşm itme dir āsāyişiniñ şükrīn edā / Ḳurudı cān u diliñ dili dudaġı ammā / Sırların itmediler seyr idüb anı ifşā / Teşnelikden açıcaḳ zaḫm-ı dehān-ı şekvā / Virdi ḫarcını hemān ṣuya beraber ḫançer

Bend iden dilleri zincīr-i teġāfüldür heb / İşleyen sinelere tīr-i teġāfüldür heb / Aḳıtan ḳanları teʾsīr-i teġāfüldür heb / Öldiren ʿāşıḳı şimşir-i teġāfüldür heb / Yoḫsa cellād-ı nigeh olmasa neyler ḫançer

Yoġ iken ḫāne-i fikretde raḳīb-i kāfir / Göñül ol dilbere o ḳalbe olurken nāẓır / Dest-i endīşeyi gerdenine atsa vākar / Alsa aġūş-ı ḫayāline miyānıñ şāʿir / Maʿni-i mısraʿ-ı bercestesi lebler ḫançer

Nūrīyā baḳ dem-i dāmān-ı gül-i ḫandāna / Bülbülüñ dīdesi māʾildir anıñçün ḳana / Ḫavfüm oldur ki çıḳa reh-güzâr-ı yārāna / Bir zemīn oldı bu Ġālib ki ḥased-kārāna / Sūsen ü lāle-i gülzārı ser-ā-ser ḫançer