Ḥaḳḳ velḭsi Ḥaydar-ı Kerrār sensin yā ʿAlḭ / Cānişḭn-i Aḥmed-i muḫtar sensin yā ʿAlḭ

Rūz-ı fıṭrat dest-i ḳudret birle deryā üstine / ʿArşıñ bünyādın ḳoyan miʿmār sensin yā ʿAlḭ

On iki burc bu yeddi yulduza menzil véren / Fāʿil bu çerḫ-i nuh-pergār sensin yā ʿAlḭ

“Ene eş-şems ʿayne’l-ḳamer”dir Muṣṭafā / Kāināta şuʿle-yi envār sensin yā ʿAlḭ

Ḥaydar-ı Kerrār oḫurlar ismiñi yā şḭr-i Ḥaḳḳ / Pes gelen bu ʿarṣaya tekrār sensin yā ʿAlḭ

Perde-yi ʿizzetde ol el kim görindi Aḥmede / Maḥrem-i Ḥaḳḳ vāfıḳ-ı esrār sensin yā ʿAlḭ

Her laʿḭniñ ḥaddi yoḫdur Aḥmede yārim diye / Ġār-ı vaḥdetde resūle yār sensin yā ʿAlḭ

Ḫāk-i pāyin sürmedür ṣāḥib-naẓarlar çeşmine / Nūr-ı ʿaynı her ulū’l-ebṣār sensin yā ʿAlḭ

Ey emḭr-i evliyā devrinde her peyġamberiñ / Eyleyen Ḥaḳḳ meẕheb-i iẓhār sensin yā ʿAlḭ

Ḥarb içinde fırḳa-yı islāma ḫayr-ı nāṣirḭn / Nāfiʿ-i şer dāfiʿ-yi eŝrār sensin yā ʿAlḭ

Leşker-i ve’l-ʿādiyāt ḥükm-ilen maḳhūr éden / Cān véren hem cān alan ḳahhār sensin yā ʿAlḭ

Şāfiʿ-yi maḥşer ḫaṭā-baḫş u kerḭm-i ʿayb-pūş / Sırrına her bendeniñ seṭṭār sensin yā ʿAlḭ

Himmetḭ bir derd-menddir ezel günden şāha / Ol faḳḭriñ derdine tımār sensin yā ʿAlḭ