Ḫam-ı gīsūlara bir baḫt-ı siyeh-kār ister / Terkeş-i nāzişine ġamze-i Tātār ister

Rāyet-i āh-ı seher-ḫīze muḳābil olamaz / Ceyş-i ḫaṭ-ı ruḫı zülfi gibi cā-sār ister

Çarpmışdur o perīyi yine bir çār-ebrū / Dil düçār olmaġ ile ol teb-i nā-çār ister

Ḥarf-i ṣıḥḥat ile eczā-yı tesellī virse / Hezeyān-gūy-ı ṭabībi dil-i bīmār ister

Neyl içün bender-i nāzişde ḳumāş-ı ḥüsne / Dil-i ṣad-pāremüzi zīver-i bāzār ister

Çār-rükn üzre żarūretle durur ḳaṣr-ı visāl / Bu ḫarābāt da ey muġbeçe mi‘mār ister

Şüst ü şū itmege deryā-yı firāvānında / Rū-siyeh ben gibi bir ‘abd-ı siyeh-kār ister

Ḫāliṣā virdi kesel köhne-binā-yı mażmūn / Böyle bir tāze zemīn açmaġa neccār ister