Bedʾ eyle ismuʾllāh ile ey ḫāme-i şirīn edā / Gir rāh-ı ʿaşḳa āh eyle reh-ber ola luṭf-ı Ḫudā

Nām-ı Ḫudāʾyı yād it bābından istimdād it / ʿAşḳı ile feryād it aġyāre itme ilticā

Ḥaḳḳa tevekkül eyleyen çeşmānını gül eyleyen / Cānın yaḳub kül eyleyen elbet bulur mā-i beḳā

Ser çeşm-i taḳdīre baḳ gezme susuz ṣoḳaḳ ṣoḳaḳ / ʿAşḳıyla cānın nāra yaḳ rizān ola ebr-i ʿatā

Ey pādīşāh-ı baḥr u ber ʿaşḳıñ ile şām u seher / Devrān ider şems u ḳamer ḳuldur saña arż u semā

Cān u cihāna ḥükm iden kevn u mekāna ḥükm iden / İḳlīm-i cāna ḥükm iden ancaḳ cenābıñdır şehā

Yā ẕüʾlcelālüʾl-cemāl ḳaldım bu yolda bī-mecāl / Ālām-ı dehre pāymāl itme be-ḥaḳḳı Muṣṭafa

Olsun ṣalāt-ı bī- ḥisāb elbette eyler kām-yāb / Dergāhıdır ḥüsnüʾl-meʿāb oldur şeh-i mülk-i ṣafā

Oldur cihānıñ mefḥarı hem sevgüli peyġāmberi / İḳlīm-i vaṣlın rehberi sulṭān-ı ceyş-i enbiyā

Murġān-ı ʿaşḳıñ pençesi oldı göñül eglencesi / Ey bāġ-ı vuṣlat ġoncasi ey verd-i gülzār-ı vefā

Dergāhıña kim intisāb itse olur keşf-i ḥicāb / Ṣaḳlar gözünde afitāb-ı ḫak-ı rehüñ çün tūtiyā

Tek fetḥ ola bāb-ı ümīd ʿuşşāḳa rāh olmaz baʿīd / Tā itmesün Rabb-ı Mecīd şeh-rāh-ı ʿaşḳıñdan cüdā

Rāh-ı emelde baña āh hem-rāh iken baḫt-ı siyāh / Olmaz mı āyā yā İlāh ṣaḥrā-yı maḳṣad rū nümā

Baḥtım siyehler baġladı ahım yürekler daġladı / Cān-ı nizārım aġladı efkār-ı dil āh u bükā

Sır virmedi aġyāra dil çün oldı pāre pāre dil / Sen var iken bī-çāre dil yā kime itsün ittikā

Arttıḳca artar ġuṣṣası taḳrire gelmez ḳıṣṣası / Miḫnetdir ancaḳ ḥiṣṣesi göñlüm gibi yoḳ bī-nevā

Ālūde-rūy-ı ḫūn u gil pāmāl-ı ġam bī-çāre dil / Dīvāneye sille degil urdı felek ṣad püşt-i pā

Ḳadrimi pek dūn eyledi cān u dili ḫūn eyledi / Ḥālim diger gūn eyledi cevr-i sipihr-i bī-vefā

Yād itdi dil pādişāhını çoḳ ṭaşa urdı başını / Aḳıtdı çeşmim yaşını bu ḳāle gelmez mā-cerā

Bir yār-ı ġārum ḳalmadı hiç rāz-dārum ḳalmadı / Ṣabr u ḳararum ḳalmadı senden meded yā Rabbenā

Mānend-i çeşm-i ʿandelīb soldı gül-i sabr u şekīb / Bu derde yoḳ özge tabīb olursa sendendir devā

Fülk-i dile itdik süvār baḥr-ı ġama yoḳ mı kenār / Göster yeter bu inṭiẓār iḳlim-i elṭāfıñ baña

Naḳdīne-i raḥmet seniñ sermāye-i kudret seniñ / Çün kāle-i şefḳat seniñ neyle olur beyʿ u şirā

Her şeb ḳuluñ Nūrī-i zār ṣubḥ-ı merāma yol arar / Maṭlab budur ey Kirdikār pür-nūr ola deşt-i duʿā

Rāh-ı ümīd içre saña bildim ki yoḳdur reh-nümā / Envār-ı luṭf-ı Kibriyā hem-rāhıñ olsun Nūrīyā