Merd-iseñ meydān içinde ḳıl şeh-i meydānı medḥ / Ġāzḭ-yi düldül-süvār server-i merdān medḥ

Ḳātil-i küffār-ı müşrik māniʿ-yi şirk u nifāḳ / Nāṣır-ı islām-ı dḭn ḥāfıẓ-ı ḭmān medḥ

Dāfiʿ-yi ḫışm u belādur rafiʿ u cürm u ʿaṭā / Şāfiʿ-i rūz-ı cezā u rāciʿ-i ʿisyān medḥ

Lāl olur maḥşerde nuṭḳ ḳılmasa her kim bugün / Şol kelāmullah-ı nāṭıḳ kāşif-i Ḳur’ān medḥ

Nuṭḳa gel cisminde cānıñ varsa ey ādemḭ / Dem-be-dem ḳıl cān u dilden ḥażret-i cānān medḥ

Farż-ı ʿayn oldı Muḥammed ümmetine eylemek / Velḭ-yi din velḭ-yi ḫālıḳ-ı subḥān medḥ

Cinn u ins u ḥur u ġılmān u melāik vaḥş-ı ṭayr / Kim édeller muttaṣıl o raḥmet-i raḥmān medḥ

Cennetiñ ne ḥaddi var aña olam diye bu ʿarṣada / Tā ḳılam şāyeste-i lāyıḳ şeh-i merdān medḥ

Defter-i furḳān içinde kirdigār-ı lemyezel / Eylemiş iḥsān édüb ol menbāʿ-ı iḥsān medḥ

Şükr-i niʿmet fikr-i ḳudret ẕikr-i raḥmet yād-ı Ḥaḳḳ / Vācib oldı bendeye daim ḳıla sulṭān medḥ

Ḥaḳḳ yolunda ey berāder müʾmin u dindār iseñ / Eyleme dünyā içün her cāhil u nādān medḥ

Şol erenler şahını medḥ eyle dāim Himmetḭ / Ḳılma Firdevsḭ kimi sen Rüstem-i dāstān medḥ