Sipihr-i feyże mehveş nūr u ferdür ḫalḳa-i tevḥīd / Gülistān-ı cemāle verd-i terdür ḫalḳa-i tevḥīd

Şeb-i deycūr-ı cehle zā’il eyler şem‘-i himmetdür / Leb-ā-leb nūr ile bedr-i ḳamerdür ḫalḳa-i tevḥīd

Ḫayāl-i vaṣl-ı cānānı hem-āġūş eylemiş ‘uşşāḳ / Çekerler sīneye bir sīm-berdür ḫalḳa-i tevḥīd

Yanar bir şu‘le-i nūr-ı maḥabbetdür çü pervāne / Döner ‘uşşāḳına bir bāl ü perdür ḫalḳa-i tevḥīd

Miyān-best-i nevā-yı şevḳ-i vicdān eyler insānı / Vücūd-ı şāhid-i vecde kemerdür ḫalḳa-i tevḥīd

Ṭılısm-ı daḫme-i nūr-ı tecellī ṭūr-ı vaḥdetdür / Ki seyyāl-āteş-i genc-i güherdür ḫalḳa-i tevḥīd

Celāl-i āteş-i cevvāle-i envār-ı hestīdür / Ki rāci‘ nūr-ı Hū-yı pür-şererdür ḫalḳa-i tevḥīd

Ḫuṭūṭ-ı feyżi pergār-ı Ḥaḳīḳat resm ider gūyā / Cenāb-ı ḳutba merkezveş maḳardur ḫalḳa-i tevḥīd

O bir mir’āt-i bī-sīm-āb-ı lerziş bāb-ı ḥayretdür / Be-ġāyet pür-‘iber naḳş-ı ṣüverdür ḫalḳa-i tevḥīd

‘Aceb mi kelleler ġalṭān olursa reh-güzārında / Ki tīġ-i meşhed-i raḥmet eserdür ḫalḳa-i tevḥīd

Olur Ḫāliṣ senüñ de belki ‘ayn-ı şems-i taḥḳīḳüñ / Cilā-yı tūtiyā rād-ı baṣardur ḫalḳa-i tevḥīd