Ölürse cism ölür bu fānḭde amma ki cān ölmez / Mesiḥā tek hemişe zindedür rūḥ-ı revān ölmez

Eger çe naḳl-éder dārüʾl-fenādan dār-ı ʿuḳbāya / Bḭ-ḳavl-i Aḥmed-i Mürsel vekḭl-i müʾminān ölmez

Neden kim ḥayy-ı fi’d-dāreyn olardur fırḳa-yı tāc / Yaḳḭn bil ḥayy-ı fi’d-dāreyn olanlar bḭ-gümān ölmez

Anıñ-çün ölmedi ʿḭsḭ aña nuṭḳum dédi ḥāliḳ / Vücūdu rüʾyete gelmez bu nuṭḳ-ı bḭ-nişān ölmez

Kelām-ı nāṭıḳım diye bu cihetden şāh-ı dḭn Ḥaydar / Kitāb-ı āsımān pes kelām-ı cāvidān ölmez

Deminden cān baġışlar ṣad-hezārān mürdeye der-dem / Ḥayāt-ı küll-i mevcūdāt ol cān u cihān ölmez

ʿAlḭdür şāh-ı taḫt-ı lā-mekān buẕāt-ı ḥayy / Maʿnḭdür ki hergiz şāh-ı taḫt-ı lā-mekān ölmez

Miŝāl-i nefḫ-i ṣūr nuṭḳ-ı pāk ey ṣāḥib-i idrāk / Çıḫar ġār-ı dehenden mehdḭ-yi ṣāḥib-zamān ölmez

Beyān eyler velāyet ʿilminiñ ol sulṭān-ı dḭn-perver / Beḳādur tā ebed ol ʿārif-i ʿilm u beyān ölmez

Velāyet ʿilm-i cennetdür olagör dāḫil-i cennet / Bu ḳavl muʿteberdür dāḫil-i dārü’l-cenān ölmez

Gel ey ʿāşıḳ-ı şeydā ol ṣıdḳ-ilen ʿaşḳında maʿşūḳuñ / Ki Ḥaḳḳdur ol şehḭdiñ ḳān behāsı rāygān ölmez

Oḫı ey Himmetḭ gel dāstān-ı Rüstem-i ʿaşḳı / Fenādur Rüstem-i destān ve illā dāstān ölmez