Ḳalmışuḳ ġam vādḭsinde hādi-yi rehber gerek / Bu ẓelāletden bizi ḳurtarmaġa bir er gerek

Yoḫ iken nām u nişan ʿālem u ādem henüz / Lif-i ḫurmā ile dḭvi baġlayan server gerek

Pence-yi ḫayber-güşā yaʿni yedullah-ı ġafūr / Mehd içinde ejdehāyı şaḳ éden Ḥaydar gerek

Ḥaḳḳ taʿālādan anıñ-çün düldül ü ḫancer gelen / Şḭr-i Ḥaḳḳ şāh-ı velayet ḳātil-i ʿanter gerek

Yār-i Aḥmed zevc-i zehrā bāb-ı şubeyr u şebḭr / Mḭr-i mālik şāh-ı selmān ḫāce-yi ḳanber gerek

ʿĀlim-i ʿilm-i ledünnḭ ḥal-i külli müşkilāt / Ḳāḍı-yı bāz-ı kebūter müftḭ-yi ejder gerek

Üstümüzden maʿṣiyet ẓülmātını refʿ étmege / Nūr-baḥş şāh-ı encüm Ḫüsrev-i ḫāver gerek

ʿĀciz oldı düşdi pervāz eylemekden cān ḳuşı / Oña lüṭfundan cināḥ-ı şevḳ bāl u per gerek

Bu selāsilden saña iḥsān éde ey Himmetḭ / Vérmege fetḥ u necatı Ḥaydar-ı ṣaff-der gerek