Ḥaydarı Ḥaḳḳ bilmeyince ṭāʿatiñ olmaz ḳabūl / Dünyā u ʿuḳbādan Ḥaḳḳdan ḥācetiñ olmaz ḳabūl

Bu ṣalāt ṣavm bu ḥac zekātıñdır ḍalāl / Ey muḳallid yaʿni farż sünnetiñ olmaz ḳabūl

Dḭn yolunda olmadı ḭmān-ı islāmıñ dürüst / Ḳıbleye ḳāmet getürme niyyetiñ olmaz ḳabūl

Ger şefḭʿiñ olmaya āl-i Muḥammed şöyle bil / Ḥaḳḳ bilür maḥşerde özge ḥüccetiñ olmaz ḳabūl

Olmasa ger ẕātıña şāh-ı velāyetden naẓar / Ḳurb-ı Ḥaḳḳdan urma dem daʿvetiñ olmaz ḳabūl

Ger irādet ʿāleminde ḳanber u selmān ṣıfat / Bende-yi şāh olmayınca hidmetiñ olmaz ḳabūl

Peyrev-i āl-i ʿabāsan iḫtiyār ét bir ʿabā / Terk-édende çünki zerḳ şöhretiñ olmaz ḳabūl

Şāh meydānında ger bu cān serden geçmeyen / Étdügiñ iḳrār-ı ʿahd u biʿatıñ olmaz ḳabūl

Ḳābıż ervāḥa cān vérdiñ gerek sen ʿāḳıbet / Ḳāḍı-yı Ḥaḳḳ meclisinde şevketiñ olmaz ḳabūl

Dem-be-dem dem urmasañ medḥ-i velḭyyullahdan / ʿÖmr içinde bir dem bir sāʿatiñ olmaz ḳabūl

Kāşif-i ʿallāmı çünkim bilmediñ ey şeyḫ-i cehl / Ḫayle u raḫtıñ cihānda ʿuzletiñ olmaz ḳabūl

Maʿrifetsiz ādemi çün ṣūret-i dḭvār imiş / Himmetḭ bir maʿnḭ göster ṣūretiñ olmaz ḳabūl