Murtażādur sāḳḭ-yi mā ṭahūr-ı mey-furūş / Kim ki munda vérdi başıñ oldı anda bāde-nūş

Baġ-ı cennetde şehḭd ol āl-i Ḥaydar ʿaşḳına / Çeşme-yi kevŝer teʾessüfden ḳılur her laḥẓa cūş

İştiyāḳından muḥibbi ehl-i beytiñ dāimā / Ḥūriler Firdevs içinde şevk-len eyler ḫurūş

Ḳoy bu zerḳi şāna gir ey pey-rev-i āl-i ʿabā / Olasın Ḥaḳḳ meclisinde cürʿa-nūş dicle-nūş

Gir ḥaḳḭḳat bostanında naẓar ḳıl her ṭaraf / Olmadın mānend-i sūsen gül teki hem cümle kūş

Mest olub cām-ı velāyetden oḫullar medh-i şāh / Ṭūṭḭ u ḳumri hezārān bülbül u her nevʿ ḳūş

Şöyle kim nuṭḳ-ı ʿAlḭden zinde u bā-nuṭḳdur / İns u cinn u ḥūr ġılmān u perḭ u ṭayr-ı vuḥūş

Bil bu güftārıñ beyānın ey benḭ ādem bugün / Var-ise ger sende idrāk ferāṣet ʿaḳl u hūş

Ẕiḳr u fikriñ olsun evṣāf-ı ʿAlḭden olma gel / Bu çemende bülbül-i gūyā kimi olma ḫamūş

Mihr-i şāh-ı evliyādur müʾminḭn ṣādıḳlara / ʿArş-ı Ḥaḳḳdan feyż-i raḥmet vaḥy-i ilhām-ı surūş

Her kimiñ cānında yoḫdur derd-i ʿaşḳ-ı şāh-ı dḭn / Olsun ol nāmerd-i nākes derd-i bḭ-dermāna ṭūş

Meclis-i ḳālū beladan ʿaşḳ-ile bu Himmetḭ / Eylemişdür sāḳḭ-yi kevŝer elinden bāde-nūş