İtmiş güşāde bir gül-i ra‘nā-yı Gülşenī / Açmış bu bāġda gül-i zībā-yı Gülşenī

İtmiş Ḫalīli āteş-i tevḥīd içinde nūr / Te’sīr-i şevḳ-i vecd ile esmā-yı Gülşenī

Gülzār-ı vaḥdet içre açup berg-i rūlaruñ / Olm ış hezār-ẕikr ile şeydā-yı Gülşenī

Sünbüllerüñ açarsa n’ola ravża-i behişt / Gīsū-yı müşg-zāy-ı ‘ıṭr-sā-yı Gülşenī

Olmış o baḥr-i vaḥdet içinde ṣadef gibi / Ġalṭān-ı ‘ışḳ ile dür-i yektā-yı Gülşenī

Teşbīh olur mı gülşen içinde bu nergise / Çeşm-i Ḫudā-yı dīde-i bīnā-yı Gülşenī

Destinde ġonca ṣanma o nev-sebz-i şāḫ-ı gül / Ṣundı şarāb-ı gül ile mīnā-yı Gülşenī

Ḥāl-i ‘iẕār-ı feyżidür ārāyiş-i cemāl / Cennetde ḥūriyāna bu sevdā-yı Gülşenī

Giymez bu çarḫ-ı aṭlası virse felek aña / Berg-i gül oldı ḥulle-i ḫārā-yı Gülşenī

Olsa ‘abāları varaḳ-ı gül ile sirişt / Güldür gül oġlıdur gül-i ḥamrā-yı Gülşenī

Enfās-ı tayyibeyle beni ḥiṣṣe-mend idüp / Ḫāliṣ virür murādını mevlā-yı Gülşenī