Deşt-i nāz-ı vaḥşet olmaz çeşm-i āhūdan ḫalāṣ / Olmadı bir būy-ı nāfe çīn-i gīsūdan ḫalāṣ

Ṭāli‘-i vārūne mi baḫt-ı siyāhından mıdur / Merdüm-i çeşm olamaz şemşīr-i ebrūdan ḫalāṣ

Lāne-sāz-ı şāhiḳ-i nāz iken ol şāhīnler / Mezra‘-ı neyl-i merām olmaz piristūdan ḫalāṣ

Çār-ebrūsıyla sebz-i ḫaṭ tesellī-sāz iken / Olmadı bir laḫẓa yāre dil tekāpūdan ḫalāṣ

Virdi gül-reng-i ruḫuñ ṣahbāya meclisde ḥicāb / Olmadı bī-çāre mey sāġarda gül-rūdan ḫalāṣ

Böyle būy-ı kākülüñ ruḫsāra eylerse dirīġ / Bir giyāh olmaz çemende būy-ı şeb-būdan ḫalāṣ

Tekye-i gülşende feryād-ı hezār itmekdedür / Bülbül-i dehr olmadı bu hāy ile hūdan ḫalāṣ

Cüst ü cū itmekde baḥr-i ṭab‘ı ġavvāṣ-ı hüner / Bulamaz endīşemüz iḫrāc-ı lü’lü’den ḫalāṣ

İtse de devrān benüm ney-pāre-i baḫtum şikest / Ṣafḥı ṭab‘-ı Ḫāliṣ olmaz kilk-i ḥoş-gūdan ḫalāṣ