Vaʿd eyleyeli vaṣlını bir ḥayli zamāndır / Ummaz mı bu cāndır

Şimdengerü ʿuşşāḳı işiñ yoġsa inandır / Gel sen beni ḳandır

Göstermedi kendin şeb-i ümmīdde ol māh / Ey nāle-i cāngāh

Bu ṭāliʿ-i ḫābīdemi sen bari uyandır / Pek ḥābı girāndır

Būs-ı lebin ey dil saña dün itmişdi vaʿd / Gūş eyleme min baʾd

Ẓinhār ḳıyās eyleme kim sehv-i lisāndır / Billāhi yalandır

Gencīne-i ḥüsne hele bir kez naẓar eyle / El çek ḥaẕer eyle

Ẓan eyleme gīsū-yı siyeh-kār-ı bütāndır / Bir ḳara yılandır

Ey zülfi siyeh ʿarşa çıḳar nāle vü āhım / Bu dūd-ı siyāhım

Heb añlaşılan ʿāşıḳınıñ kārı dūmāndır / Aḥvāli yamandır

Ebr-i emele ḳanım ḳurıdır sāḳī-i devrān / Olma buña ḥayrān

Ẓāhir begim erbāb-ı hüner curʿa-kuşāndır / Hep teşne-lebāndır

Nādāne sen esrār-ı diliñ eyleme eẓhār / Ey Nūrī-i ġamm-hār

Eksik degil erbāb-ı muʿārif bu cihāndır / Ehline ʿayāndır