Şeyḫ-i maḥbūb-liḳādur Ḥācı Bektaş-ı Velī / Nūrı çeşm-i żu‘afādur Ḥācı Bektaş-ı Velī

Ḫāk-i pāy-ı ḳademi dīdelere sürme-resā / ‘Ayn-ı pīrāna cilādur Ḥācı Bektaş-ı Velī

Derd-mendāna şifā-ḫāne-i esrār-ı Ḫudā / Ḫaste-i ‘ ışḳa devādur Ḥācı Bektaş-ı Velī

Ṭuruḳuñ olsa n’ola ṣūr ile İsrāfīli / Rūḥ-baḫş-ı fuḳarādur Ḥācı Bektaş-ı Velī

Ol hüviyyetle ḳabūl itdi fenāfi’llāhı / Maẓhar-ı sırr-ı fenādur Ḥācı Bektaş-ı Velī

Luṭf-ı Ḥaḳ’la ne ki istersen olur zīr-i ḳabūl / Gūyiyā ḫayr-du‘ādur Ḥācı Bektaş-ı Velī

Terk-i ārāyiş idüp delḳ [ü] ‘abā içre olur / Faḳr ile faḫre sezādur Ḥācı Bektaş-ı Velī

Zā’irān-ı ḥarem-i türbesidür ḥūr u melek / Himmet-i mevhibe-zādur Ḥācı Bektaş-ı Velī

Nūr-ı tennūresini her seḥer eyler taḳlīd / Şafaḳ-ı şevḳ-i semādur Ḥācı Bektaş-ı Velī

Keşkül itmez bu hilāl-i feleki destinde / Öyle sulṭān-ı Ḫudādur Ḥācı Bektaş-ı Velī

Degme elmāsları zīver-i mengūş itmez / Gerdiş-i Ḥaḳda hümādur Ḥācı Bektaş-ı Velī

Pāleheng olmaġa şāyeste degül bedr-i ḳamer / Maṭla‘-ı nūr-ı fezādur Ḥācı Bektaş-ı Velī

Ḫāliṣā sırrına Hū himmetüñ iste Ḥaḳdan / Fetḥa bir sırr-ı ‘alādur Ḥācı Bektaş-ı Velī