Çoḳ renge temessül ider āsār-ı ṭabī‘at / Ḳāle gelecek şey’ degül esrār-ı ṭabī‘at

Her sīnede bir taḥt-gehi şāh-ı ḫayālüñ / Ḥükminde Süleymān gibi efkār-ı ṭabī‘at

Ẕātında o bī-lerziş ü sīm-āb-ı żiyā-baḫş / Ma‘kūsına virmekdedür envār-ı ṭabī‘at

Eyler lebinüñ leẕẕet-i rengīnini taḳrīr / Taḥrīr ider ol ḥüsn-i ḫaṭ eş‘ār-ı ṭabī‘at

Bī-çeşm ü dehen eşk ile güftārı nümāyān / Ḥasret çeker ol ‘āşıḳ-ı ḫūn-bār-ı ṭabī‘at

Şemm eylemeden būy-ı güli eyledi taṣvīr / Būy-ı semen ü nergisi gülzār-ı ṭabī‘at

Ülfet idemez kec-rev ü kec-bīn ile hergiz / Yengān iledür cünbiş ü reftār-ı ṭabī‘at

Buldum o nihād ile siriştinde ṭabī‘at / Eyler nice mānīleri iẓhār-ı ṭabī‘at

Biñ laḥẓada taṣvīr ider eşkāl-i cihānı / Ol şu‘le-i cevvāle-i pergār-ı ṭabī‘at

Her sāza nevā-sāz-ı nühüft olsa da Ḫāliṣ / Taḥsīn olınur dāniş ü eṭvār-ı ṭabī‘at